Ang mga tawo karong panahona nahimong mga aborido tungod sa dakong panginahanglan sa pagkaon. Gani didto sa Luzon dunay usa ka kapitan ang gitigbas patay tungod kay lagi wala man mahiapil sa lista ang suspek sa Amelioration Fund.
Ang pangutana kun sala ba sa kapitan? Kinsay angay basulon?
Kinsay angay paninglan?
Apan kun buot hunahunaon, ang DSWD man ang ahensiya nga makahukom kun kinsay mahimong iapil sa final listing dili ba?
Matud pud ni Presidential Spokesman Salvador Panelo hunongon ang pagsaway kay lagi ang kinabag-ang Pilipinhon mao ra gihapon ang mabasol tungod kay wa man makapangandam ning maong pandemic.
Mabasol ba nimo ang nipatay? Hinuon dili pud rason ang pagkaaborido aron ka mokutlo og kinabuhi labina ning panahona karon.
Kay imbis imong mapatunhay ang paglaom imo man nuon gipabuhagay ang kapintas ning panahon sa dakong krisis.
Sa laing bahin, mas himoon untang dunay sistema ang pagahimoong mga plano.
Dili paigo ang inisog. Dili paigo ang panghuraw kondili mas maayo nga himoon ang hustong han-ay. Labaw na nga dili sulbad pud ang pagpunay og pabuyag kay ning panahon sa kalisdanan gikinahanglan ang malangkubong pagtinabangay sa usag usa.
Sa laing bahin, ang gikinahanglan sa matag tawo karon mao man nga mabuhi ug maluwas sa kagutom.
Ang maong kalingkawasan maoy gitinguha sa kadaghanan.
Apan unsaon man tuod pagpakabusog kun ugaling ang kahigayonan wala motugot niini.
Unsaon man pagluwas sa kagutom kun padayon kita sa utang malubong?
Naglisud man gani ang mga nasud nga adunahan kaayo samot na kaha kitang mga Pilipino?
Ning panahona karon, sa tinud-anay lang, mas mahinungdanon ang paghupot og kalmadong panghunahuna aron ang malinawong panghunahuna makatabang man aron mapinsar pag-ayo ang sunod nga pagahimoon.
Kay kun wala kini padayong tay-ogon ang atong hunahuna ug pagbati ug kun kanunay kining mahitabo, padayon gihapon kitang magpangapkap sa kangitngit. Apan dili angay mahadlok ug mabalaka kay bisan pa man sa kalisdanan karon dili maayong magpadala sa kawalay paglaum.
Ang kawalay paglaum mao man ang makapahimo nato nga mas maaborido pa gayud.