Utang nga may apelyido nang daan
Niay laing katin-awan nganong nagkarakara ang pamunoan ni Presidente Rodrigo Duterte, human nagpabungulbungol sa tambag sa World Health Organization (WHO) sa niaging duha na ka buwan, sa pagsugod na sa mass testing sa Covid-19 karong semanaha:
Hukman na unya sa Lunes sunod semana sa kadagkoan sa World Bank (WB) dasonan o isalikway ba ang $100 milyones (P5 bilyones) nga utang sa gobyerno sa Pilipinas alang sa kampanya pagbadlong sa Covid-19. Ug usa sa mga kundisyon sa WB sa di pa ihatag ang kuwarta mao ang mass testing.
* * *
Mga dokumento sa WB nagbutyag sa mga pasalig sa Department of Health (DOH) sa Pilipinas ug sukwahi nga kasayuran sa WB:
Nipasalig ang DOH nga agresibo ang ilang mga lakang batok sa Covid-19 samtang pipila pang mga kaso apan nahibaw-an sa WB nga nagkuwang nang mga tambalanan sa personal protection equipment (PPEs) ug ubang kahimanan; ug
Nipasalig ang DOH nga may komprehensibong mga lagda ug mga paagi pagbadlong sa Covid-19 apan nahibaw-an sa WB nga kutob ra ni sa ulohang buhatan ug wa kaabot sa mga lalawigan; ug
Nahibaw-an sa WB nga ang gahin sa Pilipinas alang sa kahimsog ubos kay sa ubang kanasuran (Inay gidugangan, gilaslasan sa Malakanyang og P10 bilyones sa gahin sa DOH karong tuiga).
* * *
Gitataw nang daan sa WB nga ang pagpa-utang sa Pilipinas makatabang sa paglaslas og hangtod 10% sa mga Pilipinhon nga mameligrong mangamatay tungod sa Covid-19. Gikutlo sa WB ang pagtuon sa Imperial College London nga kon di mapalambo ang kampanya sa Pilipinas, mangamatay ang 16.702 ka Pilipinhon tungod sa Covid-19 karong tuiga.
Maong gitakda na sa WB nga kon ilang aprobahan, ang utang angayng gamiton sa pagpalambo sa katakos sa Pilipinas pagpanagang, pagpangandam ug ug pagtambal sa mga mataptan sa Covid-19 sa tibuok nasud.
* * *
Sa di pa matental ang mga politiko sa pag-ambit sa dakong kuwarta, gilistang daan sa WB ang gastohan sa P5 bilyones nga utang:
P2 bilyones ang ipamalit og test kits, mga makina ug reagents alang sa mass testing;
P825 milyones ang ipamalit og PPEs, mga tambal ug ambulansiya;
P1 bilyon ang itukod ug ipalambo sa quarantine facilities; ug
P835 milyones ang ipalambo sa mga laboratoryo.
* * *
- Latest
