Di angay'ng ipanghambog
Managsama silang Health Secretary Francisco Duque III ug Health Regional Director Jaime Bernadas sa Central Visayas nga niisip nga dakong kalamposan sa ilang buhatan ang mas gamay nga mga kaso sa Covid-19 sa Pilipinas kon itandi sa ubang kanasuran sa kalibotan.
Hinaut nga may sukaranan ang sayo nilang pangangkon sa pasiunang kalamposan. Kay ang ubang mga eksperto nga mas abunda og kasinatian pagduma og mga epidemiya, sama ni kanhi Health Secretary Manuel Dayrit, nabalaka nga wa pa mahibaw-i ang mas daghang kaso sa Covid-19 tungod sa kapakyas paghimo og mass testing.
* * *
Tuod man, pila lang ka adlaw human gipasigarbo nilang Duque ug kaubanan ang kagamay ra sa ilang napamatud-an nga mga kaso sa Covid-19, mas paspas nga nisulbong ang mga kaso dinhi sa ato kon itandi sa ubang mga sakop sa Association sa Southeast Asian Nations (ASEAN) nga, sa opisyal nga taho sa Department of Health (DOH) niadtong Dominggo sa hapon, ang Pilipinas na ang naghupot sa:
Ikaduhang labing daghan og kaso (4,648), sunod sa Malaysia (4,683); ug
Ikaduhang labing daghan og patay (297), sunod sa Indonesia (373).
* * *
Gibalikbalik pagpasabot sa World Health Organization (WHO) nga di angayng sawayon ang mga nasud nga daghan og kaso sa Covid-19 tungod sa agresibong testing sa gidudahang mga kaso, pagsubay sa tanang nakaduol sa mga masakiton aron matambalan ug mabuwag dayon sa di pa makapanakod sa mas daghan.
Sa samang paagi, di sukaranan sa pasigarbo ang kagamay sa mga kaso tungod sa nihit nga testing alang sa mga grabe og kahimtang (ug dagkong opisyal sa gobyerno).
* * *
Kon managana gihapon si Duque pagpatuman sa mass testing sugod karong semanaha, nga mabantang kon palabihon gihapong burukrasya sa pag-accredit sa dugang mga laboratoryo sa Sugbo, Bohol, Negros Oriental ug ubang lalawigan, matabonan sila sa mas lapad nga testing sa pribadong sektor.
Ang higanteng mga kompaniya maoy moduma sa mass testing sa mga molupyo sa mga dapit nga ilang nahimutangan ginamit ang rapid test kits. Nga gisalikway sab sa DOH apan karon giila na sa Malakanyang ug gani gipugos nang DOH paghimo og mga lagda sa paggamit sa kits nga may resulta na human lang sa pila ka gutlo.
* * *
- Latest
