Haguka

Makapabalaka ang labing awahing kalamboan sa pagbantay sa gobyerno sa pagkatap sa novel coronavirus disease (Covid-19) tungod kay misulbong og maayo ang gidaghanon sa mga natakbuyan sa kagaw dinhi sa atong nasud.

Basi sa labing ulahing pahibawo sa Department of Health atol sa pagsuwat ko niining maong lindog duna nay 33 ka mga kompirmadong kaso sa Covid-19 dinhi sa Pilipinas.

Si Presidente Rodrigo Duterte mideklarar na usab og public health emergency tungod sa maong kalambuan. Gipasalig hinuon niya nga dunay igong pundo ang gobyerno nga magamit aron pagbuntog sa sakit.

Apan luyo sa pasalig sa presidente mao ang makapabalisa nga kasayuran gikan sa DOH sa higanteng kakuwangan sa ahensiya sa gikinahanglan nga mga testing kits. Nabisto atol sa hearing sa Senado nga ang DOH duna lay 2,000 ka mga testing kits alang sa Covid-19.

Importante ang maong kahimanan tungod kay pinaagi niini dali nga masayran kun ang nagmasakiton nga pasyente positibo bas a Covid-19 aron sa ingon mahimo ang gikinahanglan nga mga protocol paglikay nga siya makatakod sa uban.

Ang kalit nga pagsulbong sa mga kaso sa Covid-19 dinhi sa nasud timailhan nga haguka ang DOH pagpugong sa pagkuyanap sa maong sakit.

Timailhan ni nga pulos lang pagarpar ang pahibawo sa DOH nga ang nasud dunay labing kasaligang programa pagkontrolar sa pagkuyanap sa maong sakit.

Kun tinuod nga kasaligan ang mga programa nga gihimo karon sa DOH, unsaon pag-isplikar ni Health Secretary Francisco Duque III ang nahitabo nga pagsulbong sa mga kaso?

Pananglitan ang kaso sa ikapito ug ikanapulo nga pasyente nga nagpositibo sa sakit pulos way history sa biyahe didto sa mga dapit nga dunay kagaw sa Covid-19. Sigun sa report, ang ika-pito nga pasyente usa ka 38 anyos nga Taiwanese.

Wala siya makabiyahe sa gawas apan dunay direktang kontak sa mga Taiwanese nga nangabot dinhi sa Pilipinas.

Ang ikanapulo nga pasyente usa ka 57-anyos nga Pilipino ug wala sab mobiyahe paingon sa gawas sa nasud.

Ang duha pulos natakdan lang dinhi sulod sa nasud. Buot ipasabot posibling dili tanang nangabot dinhi sa nasud gikan sa mga dapit nga dunay kagaw sa COVID-19 ang napaubos sa quarantine.

Tingali angayang sublion sa DOH pagtan-aw ang ilang mga lagda aron masiguro nga mapaubos gyud sa quarantine ang tanang mangabot gikan sa mga dapit nga dunay hulga sa kagaw.