Uwahi na ang pagpanagang
Ang maayong balita mao nga ang pagdeklarar ni Presidente Rodrigo Duterte sa state of public health emergency makapalihok na sa tanang buhatan sa gobiyerno ug pribadong sektor sa hiniusang pagsagang sa kalibotanong hulga sa Covid-19.
Ang di maayong balita mao nga mahimong uwahi na ang tanan. Nikumpisal si Health Secretary Francsico Duque III nga nagsugod nang lokal nga tinakdanay sa kagaw.
Ang iyang rekomendasyon sa niagi pang buwan nga ideklarar dayong emerhensiya aron makalihok ang makinarya sa gobyerno nalangay og duha ka adlaw.
* * *
Ang deklarasyon sa presidente, nga dinalian gyud tingali kay gikatahong napirmahan niadtong Domingo apan gahapon pa gipagawas, gipanghinaot nga maka-apura sa mga kongresista ug mga senador sa pagpasar na sa P2 bilyones nga dugang pundo sa Department of Health (DOH) aron makapalit na sa kahimanan sa health workers batok sa Covid-19.
Duna hinuoy gamayng problema: Ang mga sakop sa Kongreso magsugod na sa taas nilang bakasyon sa Semana Santa karong Huwebes; unya pa sa Mayo sila mamalik sa trabaho; ug sa kasamtangan gipalabi sa mga kongresista ang linigwatay sa ilang liderato kay sa dinaliang mga panginahanglan sa DOH.
* * *
Bisan pa kun mahatagan og dugang kuwarta, mahimong maglisod nang DOH sa pagpangita og igong suplay sa surgical masks, personel protective equipment, testing kits ug ubang kahimanan tungod sa giangkon sa World Health Organization (WHO) nga kanihit sa kalibotanong suplay.
Ang ubang kanasuran nga mas una pang nangandam batok sa Covid-19 naglisod sa pagpangompra sa tanan nilang panginahanglan.
Apil sa nagkapuliki pagpangita sa dugang kahimanan ang Estados Unidos, nga sa niaging semana pa nigahin og $8.3 bilyones batok sa Covid-19.
* * *
Mosalir lang ang bisan unsang deklarasyon sa emerhensiya sa gobyerno kun makaangkon sa suporta sa katawhan.
Mosuporta lang ang katawhan kun makumbinser sa katakos ug kamatinud-anon sa kadagkoan sa gobyerno.
Ang kanihit ug kalangay sa kasayuran nilang Duque ug kaubanan sa 10 ka kaso sa Covid-19 nga ilang giangkon di maayong timaan sa ilang ka-katuohan.
Tungod sa lapad nga haw-ang, naaghat ang pribadong kompaniya, pribadong tambalanan ug duha ka local government unit sa paghatag sa publiko og dugang katin-awan sa bag-ong pito ka kaso sa Covid-19 sa niaging tulo lang ka adlaw.
* * *
- Latest
