Kampanya batok sugal

Gihingusgan karon sa administrasyong Duterte ang kampanya batok sa illegal nga sugal. Nunot niini bisan ang sugal nga gihimo sa mga nagbilar sa mga namatyan gidili na ug gidakop. Ang mga duwa nga gipustaan gipangdakop usab.

Sa miaging semana 72 ka mga tawo ang gidakop ug nakatulog gayod og prisohan tungod sa volleyball nga dayon-dayon nga ilang gikasadoan og moabot sa 27 ka libo ka pesos.

Sa miaging mga bulan nagpunsisok usab sa gawas nga bahin sa rehiyonal nga buhatan sa kapolisan ang gatosan ka mga sabongero human wala sila pagawsa sa sulod sa buwangan sa Mandaue diin sila nanabong tungod kay gidakop na diay sa mga polis. Susama usab nga senaryo ang atong nakita sa mga sabongero sa dakbayan sa Carcar human sila gidakop tungod sa pagpamuwang.

Human gipahibawo sa kapolisan nga gidili na ang pagsugal panahon sa paghaya sa patay wala pay nadakpan ang kapolisan kalabot niini dinhi sa Sugbo ug mga silingan nga lalawigan dinhi sa Visayas.

Gidakop usab sa kapolisan ug gipangsiradoan ang mga outlets sa piryahan nang bayan tungod kay ila kining gikonsiderar nga illegal. Naghinay-hinay usab sa pagpanakop ang kapolisan sa mga misakay sa prankisa sa nagpadagan og Small Time Lottery o STL sigun sa pagtugot sa Philippine Charity Sweepstakes Office.

Daghan ang nagreklamo ug miingon nga OA o over acting ra ang kapolisan dihang giapil nila sa pagdakop ang mga nagduwa ug nanan-aw sa nagduwa og volleyball nga dayon-dayon. Alang kanila paugnat sa kusog ang duwang volleyball ug dili sugal bisan pa man may nagkasadoay sa duwa.

Ilang giingon nga ang pagpusta sa duwang volleyball wala kini magpasabot nga misugal na ang usa ka tawo kun dili kabahin lamang kini sa pagdasig sa mga miduwa nga mainganyo sa pagpanigkamot sa ilang pagduwa. Busa dili unta kini apilon sa pagdakop.