Tungason ang kausaban

MARSO 8, 2020: Ikaduhang Domingo sa Kwaresma

Mga Pagbasa:  Gen. 12;1-4/Sal. 33/2 Tim. 1;8-10/Mt. 17;1-9

Taas nga Bukid ang scenario sa atong ebanghelyo karon. Kapid-an sa iyang mga tinun-an. Didto nahitabo ang mahimayaong pagkausab sa iyang pagnagway. Sa among gipahigayong tour didto sa Holy Land, gitawag kini og Mount of Transfiguration. Salamat ni Simon among tour guide nga nihatag kanamo og pagpasabot. Ang usa sa mga nindot nga makuha nato gikan sa maong panaw sa pagtuo mao man ang paglakaw lakaw sa mga sites. Nakapasingot na, nakaampo pa.

Ang bungtod matud pa simbolo sa kahilom ug mahimo usab sabton nato sa mas literal nga paagi. Nagpasabot kini og pagtungas sa atong tagsatagsa ka mga kaugalingong inner spaces. Kay diha lamang sa paghimo og suroy duaw sa atong mga inner spaces atong makita ang atong kaugalingong kahimtang, ug sa atong pagkaalinggat sa mga panghitabo sa atong kaugalingon, atong nakita ang dakong panginahanglan sa Dios diha sa atong kinabuhi.

Usa sa  mga na-miss nako kaniadto niadtong seminarista pako mao kadtong nihimo ko sa akong Ignatian Retreat sa may Jesuit Retreat House. Hilom pa to kaayo ang Jesuit Retreat House. Nindot ug lunsay pa ang palibot. Hinuon karon murag under renovation ang maong retreat house. Sa mga prayer sessions namo, akong nakita ang akong kaugalingon nga nanlimbasog gyud diha sa kahilom. Kay bisan tuod kun walay tingog nga migula sa akong baba padayong nihasmag sa akong hunahuna ang mga butang nga kun buot hunahunaon wala kinahanglana. Bisan asa na lang mobalhin balhin ang akong hunahuna mao nga gipaagi na lang nako og drawing ang tanan. Di ko maayo mo drowing pero at least nahimong napadayag nako ang bisan unsa nga buot nakong ipadayag ug ako dayon kining himoon nga  materyal sa among kukabildo sa akong Spiritual Director nga si Dindo Paradela. Kun akong I summarize ang maong retreat nakaingon ko nga Let yourself be yourself and let God be God!

Ning panahon sa Kwaresma, aron atong makita ang Ginoo diha sa kahilom, atong tugotan ang Dios nga moagni kanato sa pagsinati sa iyang presensiya. Tungason ta ang bukid diin atong himamaton si Moises nga nihatag sa napulo ka mga sugo aron masabtan nato nga ang napulo ka sugo mahimong usahon sa Sugo ug Balaod sa Gugma. Ato pud himamaton si Propeta Elias ang propeta nga nihagit sa mga sulugoon ni Baal (ako pud naadto ang dapit niya, dunay simbahan sa mga Carmelite Order didto), nga nagdapit kanato sa buhing kamatuoran nga bisan kun kita alone wala kini magpasabot og loneliness.

Daghan nato ang nahimong uhaw niining mga butanga nga mao ang mahilomong pagtimbaya sa Dios diha sa pag-ampo. Hinaut unta nga ang mga kahasol mahiklin aron espirituhanong kinabuhi mosibol. Amen? Amen! tungason man tuod ang kausaban apan ayaw kabalaka kay sa grasya sa Dios kita tabangan.