May’na lang kay naay rite med

Mipasaka na ang buhatan sa Solicitor General og Quo Warranto nga kaso ngadto sa Supreme Court batok sa ABS-CBN sa tumong nga mabakwi ang prangkisa sa maong network tungod sa giingon nga mga kalapasan niini sa lagda ug limitasyon sa ilang prangkisa.  Kon molampos ang SolGen sa ilang tumong, maingon nato nga mas na-una pa’ng natapos ang pagsibya sa maong network kay sa ilang salida nga “Ang Probinsyano”. Matud pa sa usa ka netizen, maayo ra pud kuno kay malooy na siya ni Lola Flora nga magsige lang hilak ug kagool matag episode nga naa siya.  Maayo na lang gani kuno kay nay “Rite Med”.  Hala no?

May dangan o wala, maihaw gihapon

Gipanghingusgan karon sa Cebu provincial government ang lakang nga nagdili sa pagpasulod sa mga buhing baboy ug ubang produkto sa karneng baboy gikan sa Mindanao aron malikayan usab ang pagsulod sa African Swine Fever (ASF) virus dinhi sa Sugbo. 

Nagkahulogan kini nga dili pa ma-ihaw ug malugwayan pa ang kinabuhi sa mga baboy.  Apan kadtong mga baboy nga may sakit nga ASF, ma-una gayod pagdispatsar aron di na makatakod.  Kon wala na’y kuyaw sa ASF, ihawon ra gihapon ang uban’g baboy agi ug pasalamat.  Ingon ana ra jud ang kinabuhi sa baboy.  May dangan o wala, padung gihapon sa ihawan.  Paleho la lage!

Kinsay una’ng mahagbong?

Gihinganlan ni Defense Secretary Delfin Lorenzana nga “fake news” ang pamahayag ni Presidential Spokeperson Salvador Panelo nga pormal na nga mimando ang Presidente sa pagpadala sa Notice of Termination sa VFA ngadto sa Washington.  Naghulagway kining kahimtanga sa duha ka matang sa sulogoon: ang usa abtik mosanong sa sugo bisan wa pa’y katino-an; ang ikaduha, naghiko-hiko pa sa pagtuman kay gusto jud nga siya mismo ang mando-an.   Kon magsige ug tulod-tulod si Panelo ug si Lorenzana, hayan adunay usa nga mahagbong tali kanila.  The Who kaha?

Where have all the Wuhans gone?

Nasayran nga pipila ka semana human mokayanap ang 2019 new corona virus (2019 nCov) didto sa Wuhan, China, nagsugod na diay ang ubang mga lumolupyo didto (gibana-bana nga 5 ka milyon) pagkagiw ngadto sa ubang probinsya sa China. 

Miangkon ang mga health authorities nga malisod kini nga hagit alang kanila labi na sa pag-ila ug pagtumbok sa nahimutangan sa nangagiw nga lumolupyo.  Ni’ng maong suliran sa mga Chinese health authorities, haom ang awit sa pundok nga Peter, Paul and Mary nga nagkanayon: “Where have all the Wuhans (flowers) gone?” Saoonz!

Shabu nahimong tsaabu

Sa laing balita, upat ka suspetsado ang nadakpan sa kapolisan kay naghupot ug shabu nga nagkantidad og P10 milyones nga gisulod sa pakete sa Tsa-a (Chinese Tea).  Kon nadispatsar pa ang maong matang sa Tsa-a nga adunay shabu, hayan paganganlan na kini og “Tsaabu”.  Pagkagwatsinanggo gayod sa tawo!