Naunsa na ni?

Nagtoo ko nga ang hinungdan sa paghulip ni Police Regional Director Valeriano de Leon mao ang iyang kapakyas sa paghimo og paspas nga kampanya batok sa mga illegal nga swertres dinhi sa Sugbo ug ubang bahin sa rehiyon. Sa hinapos sa miaging tuig, ang opisina ni De Leon nakadawat og suwat gikan sa Philippine Charity Sweepstakes Office (PCSO) nga gipirmahan ni Royina M. Garma nga maoy general manager. Nagtug-an kini nga grabe kaayo ang pagkuyanap sa illegal swertres dinhi sa Central Visayas.

Ang suwat nagbutyag pa gani sa mga grupo nga maoy nagpadagan og illegal swertres dinhi sa Sugbo ug ubang mga dapit sa kalungsuran, apan mora’g wala lang gyud hatagi og pagtagad sa kapolisan. Gani sa pagkakaron, padayong mikuyanap ang illegal nga swertres nga ang ubang operators mga opisyal sa kagamhanan.

Samtang maingon nato nga daghan og kalampusan ang kapolisan sa kampanya batok sa ilegal nga drugas, apan taphaw kaayo ang ilang kampanya batok sa ilegal nga sugal. Ngano man kini? Aw, ang kapolisan ra maoy angay’ng motubag niini.

Unta, ang bag-ong opisyal nga gitudlo sa Camp Crame nga maoy mohulip kang De Leon, dili na magmika sa iyang katungdanan ug molusad gyud og hugtanay nga kampanya batok sa ilegal nga mga sugal, ilabi na ang illegal swertres.

Dili ikalimod nga mikuyanap karon ang mga illegal swertres nga ang ubang operators walay kahadlok nga nagbutang pa og mga gagmay’ng booth sa lainlaing dapit sa siyudad ug probinsya. Ang akong pangutana nga kaniadto duna may Vice Squad Section nga ang trabaho mao ra gyud ang pagpanakop sa mga ilegal nga sugal. Mao kini nga sa akong programa sa radyo, ang mga tigpaminaw makaduda gyud nga gihimong “gatasan” sa kapolisan ang mga nagpasiugda niining illegal swertres ug mao kini ang rason nga wala nila pangdakpa. Tinood ba?

* * *

Nahibaw-an nako nga gi-review diay karon sa mga sinaligan ni Mayor Edgar Labella ang rekords sa mga senior citizens nga nagdawat na og cash assistance gikan sa kagamhanan sa siyudad sa Sugbo.

Matud ni Vic Romarate, usa ka kawani sa City Hall, nga may nasakpan sila nga gidawat sa OSCA nga dili gyud unta angay’ng dawaton kay wala makatuman sa lagda.

Sa programa nila ni Romarate sa radyo, siya miingon nga dunay ilang nasakpan nga paryente og konsehal sa siyudad naapil nga nahatagan og cash assistance bisan og wala makatuman sa lagda.

Wala pa hinoon ibutyag ni Romarate kun kinsa ang maong senior citizen, pero matud nila, kini diay maoy nakapalangay sa paghatag og cash assistance sa mga senior kay ila gyud nga gihashasan pag-ayo ang rekord.