Si Father Fernando Suarez

Usa sa mga baniog nga imahen sa Healing Ministry dinhi sa atong nasud  mao man ang pari nga si Father Fernando Suarez. Nabantog siya ingon nga Healing Priest. Gani nahimo man siyang inila ug pinangita sa nagkadaiyang mga pundok sa mga charismatic communities. Daghan ang mopahulagway kuyog niya ug daghang mga pari dinhi sa Sugbo ang nahimo niyang suod tungod kay matag tuig magpahigayon man siya og Torneyo sa Tennis.

Mahiligon ug moduwa pud siya og tennis. Daghan usab ang nibatikos kaniya ug sa iyang kapasidad. Daghang mga akusasyon batok kaniya. Daghan usab ang nibato og mga pasangil kaniya bisan gani mismo sa mga kaparian ug mga kaobispohan nga wala kauyon kaniya. Hinuon ang Vaticano mismo mao man ang nipakanaog og hukom nga siya walay sala sa mga akusasyon batok kaniya.

Nakurat ang kadaghanan kay sa dihang gihimo ang pagduwa niya og tennis didto sa kaulohan giatake siya sa kasingkasing ug wa nagdugay namatay.

Ang iyang gikahinamang duwa mao ra puy hinungdan sa iyang kamatayon o basin wa pa siya magduwa iya na gyud tong adlawa. Namatay siya bisan pa man kun healing priest siya.

Apan usa sa mga binuhiang statement ni Padre Suarez mao man ang iyang pag-ingon nga ang tinud-anay nga Mananambal mao ang Ginoo nahimo lamang siyang kasangkapan niini.

Sa healing ministry ang healer mismo masakiton mao bitaw nga ang matag healer gitawag man nga wounded healer kun samaran nga manambal. Kun maghisgot kita samaran nga mananambal nagpasabot kini og pagpangangkon nga sama sa uban anaa pud ang kahuyangan pisikal man, espiritwal man, ug uban pa. Nagpasabot lamang kini nga walay hingpit ug walay exempted sa kamatayon dinhi sa kalibutang tawhanon. Si Padre Fernando Suarez ang naningkamot nga magpuyo pud sa kinabuhing balaan apan sama sa uban siya usab dunay kahuyangan kini tungod kay sama sa kadaghanan siya tawo lang pud nga dunay limitasyon. Sa maong limitasyon mas mapadayag pa nato ang Diosnong gahum.

Sa dihang gipangutana ko kun nganong nagpakahilom rako pag ayo sa dihang gitutukan ko ang krusipiho, wala koy laing naingon gawas ang pagpangangkon nga ang Dios gamahanan gyud kaayo ug kinsa ra gud kong mosuway og tugkad sa iyang gahum? Ang kamatayon ni Padre Suarez pahinumdom nga ang tanang kasinatian sa milagro dinhi sa kalibutang lumalabay mamahimong ulusahon sa kinabuhing dayon. Siya nag-una kanato ug kita ang mosunod. Kanus-a kini mahitabo, wala ta masayud.