Ban sa mga Chinese

Girekomendar na nilang Cebu City Mayor Edgardo Labella ug Lapu-Lapu City Mayor Junard Chan ang pagdili pagsulod sa mga langyaw gikan sa China agi og paglikay sa posibling pagsud sa gikahadlokang “nobel coronavirus.”

Anaa sa dakbayan sa Lapu-Lapu mahimutang ang Mactan Cebu International Airport diin dunay dili 36 ka direktang flights paingon sa China matag-semana. Kini naglakip sa rota paingon sa Guangzhou, Xiamen,Chengdu, Shanghai, Shenzhen, Nanjing, ug Hangzhou.

Samtang dinhi sa dakbayan sa Sugbo daghan ang mga tourist spot nga dugokon sa mga langyaw, apil na sa mga turistang Intsik. Buot ni Chan nga did-an sa Department of Health ang mga flights gikan sa China. Si Labella sab miawhag sa Bureau of Immigration nga pugngan ang pagsulod sa mga turistang insik.

Sa kasamtangan kapin na sa usa ka gatos ka mga tawo ang namatay didto sa China tungod sa maong sakit. Mikabat na usab og dul-an sa 5 mil ka mga tawo ang natakbuyan niini. Samtang  duna nay labing minus 14 ka mga nasud ang mikumpirmar nga duna na silay kaso niini.

Dinhi sa Pilipinas, matud sa DOH wala pay kumpirmadong kaso apan dunay kapin sa 20 ka mga pasyente ang gibantayan tungod sa mga simtomas sa maong sakit.

Taliwa sa kahadlok, ang mga opisyal sa DOH nag-awhag sa publiko nga magpabiling kalmado.

Gani hangtud karon ang DOH wala pa gyud morekumendar nga i-ban ang turista gikan sa China ug sa ubang dapit nga dunay kumpirmadong kaso sa nobel coronavirus.

Ang gihimo nilang Chan ug Labella personal nilang desisyon aron kaprotihian ang ilang mga molupyo gikan sa makamatay nga sakit.

Kabahin ni sa gahom sa mga local chief executives ubos sa “General Welfare Clause” nga gilatid diha sa Local Government Code.

Mamahimong overacting ang gihimo nilang Chan ug Labella, apan dili nimo silang mabasol.

Mas maayo nang maglikay kaysa magpabaya tungod kay kun ang mas modernong nasud sama sa China nagkapuliki pagsanta sa pagkuyanap sa maong kagaw, unsa kahay atong kahimtang kun simbako matakbuyan ta niini.

Kwestiyonable ang kaandam sa atong mga tambalanan ug sa atong gobyerno mismo pagtubag sa maong krisis kun simbako dili nato kapugngang daan ang pagsulod niini.

Dili kaya sa atong mga tambalanan ang pagtubag sa maong emerhensiya taliwa sa dakong krisis nga ilang giatubang sa kakuwang og mga nurses.

Gani pipila sa mga dagkong pribadong tambalanan sa dakbayan sa Sugbo misirado naman sa ubang andana sa ilang tambalanan tungod sa kakuwang og staff.