Mabaw si Young

Sa dihang gibawsan sa pagsaway si Cebu City Konsehal Joy Augustus Young ni Presidential Assistant for the Visayas Michael Llyod Dino agi og depensa kang Presidente Rodrigo Roa Duterte iyang gipangatarongan nga wala siya manaway sa Presidente.

Mipagawas lamang kuno siya sa iyang panahom mahitungod sa sugyot sa Presidente sa mga lokal nga opisyal sa dakbayan sa Sugbo nga sagupon ug kopyahon ang teknolohiya nga gipatuman sa kaulohan alang sa pagsumpo sa grabi kaayong suliran sa trapik.

Ang konsehal nagkanayon nga isip pinili sa kapin usa ka gatos ka libo ka mga tawo sa dakbayan sa Sugbo aduna siyay katungod sa pagpagawas sa iyang panahom. Dugang sa konsehal, ang iya kuno nga mandato gikan sa gidaghanon sa mga tawo nga mibotar niya sa milabay nga eleksiyon dili pariha sa kang Mike Dino nga ang mandato sa pagbotang kaniya sa katungdanan gikan lamang sa usa ka tawo.

Mabaw ra kining maong rason ni Young tungod kay usa ra tuod ka tawo si Presidente Rodrigo Roa Duterte nga nagbutang ni Mike Dino isip Presidential Assistant for the Visayas pero ang Presidente gibutang sa kapin napulog unom ka milyon ka mga tawo sa Malakanyang.

Bisan unsaon pa pag rason ni  Young dili gayod niya matago ang kamatuoran nga iya lamang gipakagamay ang gahom sa Presidente sa Pilipinas sa pagtudlo og opisyal, gahom nga gihatag sa katawhan sa nasud.

Hinuon dili ug klaro kaayo nga mga panaway ang mogawas sa baba sa konsehal tungod kay wala man siya mobotar niini niadtong miaging Presidential nga piniliay.

Samtang katungod sa katawhan ang pagpadayag sa iyang panahom apil na niini ang pagpanaway pero mas maayo pud nga motanyag ang konsehal og alternatibo nga sulbad kun manaway man ugaling kini sa sulbad sa suliran.