Habalhabal gimahal

Usa ray kinabuhi ang tawo. Busa, angay ampingan. Apan usahay, tungod sa kakabos, daghan ang mapugos pagsugal sa ilang kinabuhi aron lamang may ikapakaon sa gipangga nilang pamilya.

Dili igsapayan kon ang nasudlan nilang matang sa panginabuhi, kanunayng nagpahinumdom nga ang giatubang matag gutlo diha sa ilang pagpakiharong sa kawad-on, mao ang makuyaw nga unahan.

Basta may ikatunol lang sila ni misis nga ikapalit og duha ka kilong bugas, usa ka putos nga pansit ug usa ka hiwang humba nga saw-an nilang tibuok pamilya sa pagpangaon. Sila, happy na!

Mao kini ang giasoy sa usa ka diyanitor, kinsa under sa usa ka ahensiya sa housekeeping dinhi sa siyudad sa Sugbo. Matud niya, gamay ra ang iyang makobrang suweldo sa usa ka kinsena.

Di gani kaabot og P5,000. Unya, kuhaan pa gyo’g SSS contribution, PhilHealth ug uban pa. Pastilan, pila na man lang intawoy mahabilin?

Hinungdan nga may motorsiklo man iyang igsuon, iya kining gihulaman ug gihimong habalhabal. Kada human sa iyang trabaho, mamasahero siyag habalhabal. Malipay na siyang makagunit og P300 nga kita. Makatabang na kini. Busa, natugkan siyag pagmahal sa habalhabal.

Kaniadto, sa may eskina Forest Hills, M. Velez St., Banawa, pulos mga pedikab ang maglaray daplin sa dalan nga mamasahero.  Dili kini molarga kon dili mapuno.

Busa, dihang dunay misulay pagpamasaherog habalhabal, diin desididong mohatod sa iyang sakay bisan sa lagyong lugar basta magkasabot lang sa presyo, dali rang nahanaw ang mga tricycle, uy. Mga habalhabal ang mipuli. Hasta mga tricycle drivers nag-habalhabal driver na. Kay gawas nga mokitag dako, makahatod pag mga guwapang pasahero.

Gani, may lungsod man nga ang suking maestra nga dumdumog hatod-kuha sa habalhabal driver didto sa bukid nga gimaestrahan, mimabdos. Resulta? Aw, nakaasawa ang drayber og titser!

Dinhi sa siyudad, diin nagkaanam kagrabe ang trapik, sagad sa mga empleyado o estudyante, habalhabal ang sakyan. Kay mas dali silang moabot kontra sa four wheels nga dugay makalusot.

Daghan ang nakabenepisyo sa habalhabal: ang liboang drayber ug libolibong pasahero.

Mao, nga dili gyod kapugngan ang nagbahang kasingkasing nga nakat-on pagmahal sa habalhabal.

Busa, husto kaayo ang nakab-ot nga desisyon sa mga magbabalaod, nga ang Angkas ug mga habalhabal, himoon nang legal.