Sabton nalang nato

Gibisitahan nako ug sa mga kauban ko sa media ang Vicente Sotto Memorial Medical Center kaniadtong Martes.

Mi-improved na tuod ang pasilidad sa tambalanan kon itandi nimo kaniadtong mga tuig 1985 ngadto sa 1990.

Sa bag-o pa ko nga reporter, ang VSMMC usa sa akong beat nga kuhaanan og mga balita.

Kadala adlaw, magbalikbalik ko diha sa maong tambalanan ug mao nga nasuheto kaayo ko sa sitwasyon niini.

Karon, milambo na tuod, kay gikan sa kanhi 300-bed capacity hospital, nahimo na man karon nga 1,200-bed capacity.

Midako na usab ang iyang tinuig nga budget. Apan kon ako ang pasultihon, dili pa gyud perfect tungod sa rason nga pwerteng daghana nga mga pasyente nga nagpunsisok sa nga wards gikan sa lainlaing dapit.

Ang emergency room pwerteng huota ug lang-og kaayo og baho.

Sa mga pribadong ospital, ang masimhot nimo mao ang baho sa medisina, apan sa VSMMC emergency room, ang kalang-og maoy imong masimhot.

Dili ba kaha mao kini ang rason nga hilabihan ka estrikto sa mga tagdumala sa maong ospital nga dili na basta-basta nga magpasulod og mga sakop sa media?

Usa sa akong natan-aw mao nga gitugotan man gud nila ang mga pasyente nga magdala og ilang kaugalingong mga habol ug ubang gamit.

Sa pribadong ospital ang ilang habol bisan limpyo pa gani, ilisan na baya.

Usahay kada adlaw pa gani ang pag-ilis sa mga bed sheet ug habol.

Pero sagdi lang na kay makasabot man sab ta nga nagdaginot man tawon sa budget ang ospital.

Apan ang akong gidayeg mao ang gihimo sa mga kongresista nga mitabang sila sa mga pasyente sa VSMMC.

* * *

Kaniadtong Martes, ang budget para sa tambal sa VSMMC nadugangan og P16 milyones.

Si Kongresista Lolypop  Ouano-Dizon sa Cebu’s 6th congressional district nakigpirmahay sa director sa VSMMC sa paghatag og P11 milyones nga financial assistance alang sa medical ug hospital expenses sa mga pasyente sa Vicente Sotto Medical Center ug sa Eversley Child Sanitarium Hospital sa Mandaue.

Unya si Kongresista Janice Salimbangon mitagana sab og P5 million.

Maayo na lang ni nga tabang kay kapahimuslan man gyud ni sa mga lumolupyo sa duha ka distrito.