Sa ebanghelyo ni Markos kapitulo 2 bersikulo 13 hangtud 17 nahimong isyu ang gihimo sa atong Ginoo ug sa iyang mga tinun-an sa dihang ilang gihimo ang pagpanguha og uhay sa trigo mismo sa Adlaw nga Ipagpapahulay.
Supak kini sa ilang balaod mao nga ang mga Pariseo nga nakasaksi sa maong hitabo ang na eskandalo sa gipakitang taras ning moral figure nga ginganlan og Jesus nga unta maoy mopakita og maayong sanglitanan sa pagsunod kun unsay gilatid apan mao naman hinuon ang nagpasiugda ning maong rebolusyonaryong paghubad sa Balaod kalabot sa Adlaw nga Ipagpapahulay.
Kay alang ni Jesus ang Adlaw nga Ipagpapahulay gihimo alang sa kaayohan sa tawo ug dili ang tawo alang sa Adlaw nga Ipagpapahulay.
Ning maong pamahayag atong nakita dinhi nga mas mahinungdanon gyud diay ang kinabuhi kaysa bisan unsang giisip nga mga mando sa relihiyon.
Ang tanan kinahanglang magsukad gyud sa bisan unsang sukaranan ug kini naglambigit sa malangkubong kaluwasan.
Dili paigo ang pagsunod lang kun unsay gilatid sa balaod kondili ang paghatag niini og hustong hubad nga sibo sa panginahanglan sa pahamtangan niini.
Dili kini mahitungod lang sa gitawag nilang han-ay kondili mahitungod kini sa kinatibuk-ang pagsabot sa bisan unsa nga atong sundon dili ba?
Nahinumdom ko kaniadto niadtong nagtungha pa ako sa college seminary.
Matag Hwebes pagahimoon namo ang Grand Silence sa tibuok seminaryo. Ako mismo nasayud man sa among balaod apan lagi dunay usa ka higayon nga nindot kaayo ang akong trip sa dihang naggitara ko sa huni sa hotel california.
Ang resulta gipaluhod tawon ko kuyog sa akong classmate nga si Wilfred Caballero.
Nag aborido ang akong hunahuna ug pagbati apan sa kaulahian nakita ko ang rason kun nganong giingon ato ko nila.
Nakita ko kini sa dihang nahimong sama na ako sa akong mga formators kaniadto.
Hangtud karon akong gihambin ang maong kasinatian apan ning tungora igo na lamang ko sa pagpahiyom.
Nakontrahan gyud si Jesus tungod sa iyang gibuhat kaniadto apan ang maong pagkontra usa lamang ka defense mechanism kay dili buot ang kadaghanan nga mobiya sa bisan unsa nga naandan.
Ang naandang kasugoan iyang gihimong mas makahuloganon diha sa paghubad niini diha sa konteksto sa kalambigitan.
Mas mahinungdanon gyud ang tawo kaysa bisan unsang butang.