EDITORYAL - Proteksiyon sa kabataan

Ang Republic Act 7610 o Special Protection of Children Against Abuse, Exploitation and Discrimination Act ug Republic Act 9344 o Juvenile Justice Act, mas naila sa mga tawo nga mga Anti-Child Abuse laws, mao ang paagi sa gobiyerno nga masiguro ang proteksyon sa kabataan.

Panigurado kini nga kadto ra gyung mga indibidwal nga husto na sa pangisip maoy mabilanggo ug luwason ang kabataan pinaagi sa pagreporma kanila aron mapuslang mga molupyo sa Pilipinas.

Kaakohan nga gibuhat sa gobiyerno ngadto sa kabataang Pilipino human masuta nga gawas nga dunay mga kabataang giabusaran sa pisikal, emosyonal ug piansyal, daghan ang gigamit sa eksploytasyon sa mga mapahimuslanon.

Ang maong mga balaod kanunay masaway dili lang sa publiko kondili sa mismo pang mga tigpatuman sa balaod.

Matud pa nga gigamit na sa mga kriminal ug mga sindikato sa ilegal nga drugas ang kabataan ubos sa edad nga 18 anyos kay sayod silang way criminal liability ang mga menor de edad.

Agi og sakbang sa gihimo sa mga ilegalista, giluto ug nagung-ong karon sa Kongreso ang tinguhang paubsan pa ngadto sa 15 anyos, duna say uban nga 9 anyos ang age of criminal liabilities.

Ang lakang gipangusgan sa kapolisan ug mga anti-crime advocates.

Sa pagkakaron, ang mga CICLs (children in conflict with the law) ipahiling sa mga social workers aron pagsusi kun nasayod ba silang krimen ilang nabuhat una pa sila kasohan og kriminal.

Sa pagkatinuod mas daghan ang wala makasabot ug wa matuman tanang mga probisyon aning mga balaora.

Samtang tinuod maayo ang tumong sa mga gustong ipausab ang age of criminal liability, mas maayo usab tingaling unahon pagsubay kung asa sila nasayop sa implimentasyon sa kasamtangang mga balaod.