Gustong patituluhan ang portion sa lote nga gipalit

Dear Atty. Divine,

Dunay yuta nga gusto nako nga paliton apan portion lang nga bali og 300 square meters. Titulado ang maong property ug tibuok pa ang title niini. Gusto unta nako nga matipak gikan sa mother title ang 300 square meters nga akong paliton kay ako sab kini nga patituluhan. Ang akong pangutana kun unsay una nako nga buhaton? Pila kahay magasto nako niining tanan? Daghang salamat.

Jerry

* * *

Dear Jerry,

Kun gusto nimong ma-separate ang portion or ang 300 square meters nga imong paliton gikan sa kinatibuk-ang lote, ang una nimong buhaton mao ang pagpa-survey niini ug dayon dapat ipa approve sa surveyor ngadto sa Bureau of Lands ang imong subdivision plan nga nag-separate sa imong portion nga gipalit. Ang bayad sa pagpa-survey magdepende sa rate sa imong geodetic engineer.  Gawas sa bayad sa pagpa-survey mogasto sab ka sa pag-process sa transfer sa imong gipalit nga portion nga naglakip sa taxes sa BIR nga mao ang Capital Gains Tax ug Documentary  Stamp Tax nga 7.5% sa selling price or zonal value whichever is higher.  Mobayad sab ka og  transfer tax para sa pag-transfer sa tax declaration ngadto sa Assessors Office ug dugang bayranan usab ini’g proseso na nimo sa pag-transfer sa title ngadto sa Register of Deeds. Ang  copy sa original nga mother title imong unya i-surrender sa Register of Deeds ini’g proseso nimo kay mo issue man ang RD og bag-ong title sa imong 300 square meters og laing titulo sab ubos sa name sa seller ang i- issue sa remaining portion basi sa imong approved subdivision plan. Thanks and God bless.

Atty. Divine

* * *

Alang sa inyong pangutana ipadala lang sa Legal Corner sa Banat News or email sa [email protected] ug akong tubagon ang inyong pangutana  pinaagi sa akong column matag Miyerkules , Sabado ug Domingo.