Daw sa extended ang atong pagsaulog sa Pasko dinhi sa ato kay human sa Pasko sa Pagkatawo niadtong buwan sa Disyembre, ato naman pud paabuton uban ang dakong kahinangop ang buwan sa Enero sanglit karong buwana, buwan man gyud alang sa Balaang Bata nga si Senyor Santo Nino.
Didto sa Manila ila pud saulogon ang pangilin sa Itom nga Nazareno.
Didto sa kaulohan nahimong isyu ang seguridad sa kadaghanan labina kun maghisgot na sa translacion. Kini tungod kay daghang mga tawo ang mahimong mabiktima sa grabeng dinut-anay, ang uban tungod sa tensiyon mahimong atakihon sa alta presyon. Pagtuo pa ba kini o fanaticism ingon tang pulonga.
Apan dunay sukaranan kun nganong alang natong mga Pilipino kusog kaayo ang atong debosyon kini tungod sa atong pagsabot sa Dios. Segun sa panahom ni Fr. Jaime Bulatao usa ka paring Heswita ug Clinical Psychologist niining siya nga ang Dios alang nato usa man ka personal presence, gani ato pa man siyang gihatagan og mas suod pa gyud nga titulo sama sa tawag nga Papa God, Papa Jesus.
Kabahin gyud siya sa atong pagkatawo ug sa atong pamilya. Sa laing bahin, nahimo pud siyang dalangpanan panahon sa atong panginahanglan, shock absorber panahon sa kapakyasan kay sa mosugot ta ug sa dili daghang mga higayon nga sa atong kaparotan Dios pud ang atong pasanginlan.
Apan labaw sa tanan, panahon sa atong kadaugan siya man pud atong pasalamatan. Mao tingali nga nahimong mas in usab ang mga personal nga pag-ampo ngadto sa Dios gumikan ning maong panlantaw ug baruganan sa kadaghanan.
Ang Nazareno ug ang Santo Nino kun atong tan-awon mga hulagway sa Dios diha sa kahimtang sa vulnerability ug panginahangaln, o tingali tungod sa tinguha sa matag mortal nga mamahimong in control sa giisip nga bisan unsang diosnon ang modangop ning maong mga imahen sa pamasin nga ang batang Jesus, malukmay kay siya maulo ullohan gumikan kay lagi siya bata.
O ang Jesus Nazareno tungod sa iyang dakong gugma alang natong mga makasasala mao nga kun magluhod kitang mopaduol sa altar sa simbahan sa Quiapo padayon kitang dunggon ug pasayloon bisan pa man kun inigka ugma mobalik kita sa atong naandang buluhaton sa pagpangilad ug pagpakasala.
Hinuon alang natong mga Sugbuanon wala kaayo mauso ang pagdinuotay aron lamang makahalok sa Diosnong Bata gani, sa atong pagtimbaya kaniya panahon sa atong translacion nahimong hapsay ang tanan. Kini tungod kay nasayud man kita sa atong dapit diha sa natad sa atong tinuohan.
Daghan man tuod sa gihapon ang patuo tuo ug nagpabiling usa ka dakong hagit alang sa atong Simbahan ang pagtudlo kun unsay husto, apan usa lang gyud ang akong ikasulti, ang Dios nagpakatawo aron kita makaambit sa iyang pagka Dios! Viva Pit Senyor!