Kini ang hugot nga ipatuman sa sulod ug gawas sa Basilica del Sto. Niño sa pagsugod gyud sa Misa Nobenaryo.
Ipatuman kini sulod sa 100-meter radius gikan sa Basilica tungod kay maghatag kuno kini og peligro.
Nakasabot ra ang mga manindahay og balloon aron dili sila makahatag og kahasol sa kalihokan sa mga deboto.
Hinuon kadtong balloon mga molupad ra ang idili apan kadtong naay stick tugotan ra nga mabaligya sa gawas.
Ang balloon mao ra ba gyud ang kinaham sa mga bata nga dili gyud magpabalibad kon mabihag sa balloon.
Samtang lakip sa higpit nga idili ang pagkuha og selfie sulod sa Basilica ilabi na kon magsugod na ang misa.
Gipasabot sa pangulo sa safety and security sa Basilica nga makadisturbo sa ubang mga debotoa ang kanunay nga pagselfie sa katupad.
Gawas pa, usa ka solemne nga kalihokan ang tambongan sa simbahan busa buyagon gyud sa mga gwardiya kadtong makita nga mag selfie atol sa misa.
Bitaw ang tumong sa pag-adto sa Basilica mao ang pag ampo sa Balaang Bata dili ang pag-ampo sa kaugalingong nawong.
Kung mag-selfie naman lang adto nalang sa gawas yawat nalang malabni sa kawatan ang nawong este ang cellphone.
Laing awhag sa mga tawo, deboto man o turista nga kinahanglan nga magsul-ob og tarong.
Dili kanang mga makita na hapit ang sulod sa ginhawaan tungod sa ka revealing ug makatintal sa mata sa uban.
Ayaw himoa ang imong kaugalingon nga bitin nga nagtintal kang Adan ug Eba, respeto naman lang dili alang sa uban kon dili sa imong kaugalingon isip binuhat sa Dios.
Sa kinatibok-an 100 percent na ang Basilica sa ilang kaandam sa kapistahan ni Senyor Sto. Niño.