Nabisto na ang baraha
Human sa tulo ug tunga ka tuig nga pagduma sa Malakanyang, nabantang na ang kusganong mga baruganan sa pamunoan ni Presidente Rodrigo Duterte sa mosunod nga mga kontrobersiya:
Kusganon nila nga gidid-an sa pagpasud sa nasud sa mga opisyal sa kalibotanon nga kahugpongan ug ubang kanasuran nga giisip nga mga kaatbang sa ilang mga programa; ug
Kusganon nila nga gibalibaran ang sibaw nga mga awhag sa pagdili sa pagsud sa nasudnong teritoryo sa langyaw nga mga puwersa ug mga kontrobando nga giisip nga makadaot sa interes sa kinabag-an sa katawhan.
* * *
Ang mosunod wa lang did-i kon dili gipasidan-an pa gyod nga bilangguon, sagpaon ug pamatyon kon mangahas sa pagsuway pagtaak sa nasud:
Mga imbestigador sa United Nations Human Rights Commission nga nipasar og resolusyon pagsusi sa pagpangyatak sa mga tawhanong katungod sa Pilipinas;
Prosecutor sa International Criminal Court nga nagsusi may sukaranan bang kasong Crimes Against Humanity nga gipasaka batok ni Presidente Duterte; ug
Mga senador sa Estados Unidos nga nagpasiugda sa balaod nga mobasura sa mga visa sa mga opisyal nga gilambigit sa pagpabilanggo ni Senador Leila de Lima.
* * *
Sa pikas nga bahin, hugtanon nga nibalibad ang pamunoang Duterte sa pagdili sa mosunod nga gawasnon ug pinatuyangan nga paglapas sa atong nasudnong teritoryo:
Pagpayuhot sa nagkadagko nga mga kontrabando sa shabu nga ang kasagaran gidudahan nga gikan sa China;
Pagpalusot sa nagkadaghan nga ilegal nga mga pabuto nga niangol sa mga bata ug mga dagko nga nisugat sa Pasko ug bag-ong tuig; ug
Pagsud sa nagkadaghang mga barko sa China sa West Philippine Sea ug pagpaghasi sa Pilipinhong mga mangingisda.
* * *
Sa nahibilin nga duha ug tunga ka tuig sa termino ni Presidente Duterte, ambot mopaundayon ba lang gihapon ang katawhang Pilipinhon sa nabisto nang baraha sa iyang liderato:
Labihang isoga nga manghudlat ug manggukod gyod gani ni bisan kinsa nga mopahinumdom nila sa pagsubay sa balaod sa kampanya batok sa ilegal nga drugas ug mosusi ug, sa kaso sa Estados Unidos, mosilot gyod gani sa mga opisyal nga gipasanginlan nga nakahimo og kalapasan; apan
Labihang lubaya nga kanunay gyod nga mobahag ang ikog ug moduko og paawot kon China nay pasanginlang nakahimo og krimen.
* * *
- Latest
