Niining pagsutoy sa Bag-ong Tuig, buwenas karon ang mga ordinaryong mamumuo, ilabina dinhi sa Central Visayas, tungod kay magsugod na pag-epekto ang direktiba sa niaging tuig nga nagtaas sa ilang inadlaw nga suholan.
Sugod kagahapon, magsugod na pag-take effect ang salary adjustments dinhi sa rehiyon.
Kini sumala pa sa order nga gipagawas sa Regional Tripartite Wages and Productivity Board kaniadtong Nobiyembre 26 sa niaging tuig.
Maayo kini nga balita alang niadtong mga mamumuo niining pag-arangkada sa mga unang mga adlaw sa 2020. Mapun-an na gayud og P18 ang ilang inadlaw nga suholan ug dako kining tabang sa ilang mga pamilya.
Hinaut nga motuman niini ang sektor sa pamatigayon ug nga moyukbo ngadto sa direktiba sa wage board.
Kinahanglan nga dili na magpagoryo-goryo pa ang nga negosyante pagtaas sa sweldo sa ilang mga trabahante.
Dili nato ikalimod nga adunay mga establisimento nga hagbay ra nga nagpakabuta-bungol sa order sa kagamhanan pag-isa sa suholan sa ilang mga empleyado.
Ug bisan unsa na lamang ang ilang rason sa pagdumili pagsunod sa direktiba.
Ang problema niini mao ang pagkawalay ngipon sa kampanya sa kagamhanan batok niadtong mga establisimento nga wala nagsunod sa order ug nagdumili paghatag og dugang taas sa suholan sa ilang mga trabahante.
Mao nga usa usab nga mabasol mismo ang atong gobiyerno gumikan sa kahinay paglihok niini pagpitik sa mga dalunggan sa mga negosyante nga nagpatuyang lamang sa ilang gibati sa pagbaliwala sa direktiba sa wage board.
Mao nga mag-anad na lamang usab kining mga establisimento pagpatuyang sa ilang posisyon pagdumili sa pagsunod sa direktiba.
Ug panahon na gayud nga mohimo ang gobiyerno og konkreto nga lakang pagsulbad niining maong problema.