Taktaka na sila mayor!

Bag-ong tuig na, ug maayo unta og gitangtang na ni Mayor Edgar Labella ang mga kawani sa Dakbayan sa Sugbo nga nasakpan nga mga tiggamitan diay og shabu.

Gipahibawo ko ni Jonah John Rodriguez, ang pangulo sa Cebu City Office for Substance Abuse Prevention (COSAP), nga karon miabot na og 71 ang nasakpan nila nga positibo sa paggamit og shabu.

Sa wala pa’y Pasko, 57 ang katapusang ihap sa mga drug positives, apan nadugangan kini og 14 human nga migawas na ang mga resulta sa sagunson nga drugtest nga gihimo sa COSAP.

Nakapanglingo-lingo ko kay ang lima sa 14 nga bag-ong nasakpan nga mga drug users, nadistino sa City Health Department ug may upat ka traffic enforcers sab nga napositibo sa drugas.

Unya, usa bag-ong kawani sa Department of Public Services (DPS) ug laing usa sab sa Department of Engineering and Public Works (DEPW), usa lain pa gyud nga usa sa DSWS, nasakpan sab nga drug users diay.

Laing duha ka kawani sa Accounting Department, ug usa niini permanent employee, napositibo sa paggamit og shabu. Unya, usa ka kawani sa Mayor’s Office nga tua gidestino sa MICS, kun Management Information and Computer Services nasakpan sab nga drug user. 

Para kanako, dili gyud angay nga patrabahuon sa gobiyerno kining mao nga matang sa mga tawo. Ang usa ka kawani sa kagamhanan angay’ng maoy magsilbe nga sumbanan sa katarong, ug dili kay maoy maghimo og binuang.

* * *

Usa ka sakyanan nga iya sa kagamhanan, nakit-an ni Barili Vice Mayor Julie Flores nga nagdagan sa usa ka dapit sa southern Cebu nga mora’g katumbahon.  

Sa laktud nga pagkasulti, makita sa hulagway nga naghibat na ang sakyanan ug kon ayuhon lang sa pag-inspection sa LTO, dili na gyud katugotan nga makadagan pa.

Para kanako, ingon niini nga matang sa mga sakyanan dili na angay’ng padaganon pa. Dili na tugotan nga marehistro pa kay makadugang lang kini sa kahuot sa atong mga karsada ug makahatag og peligro sa ubang mga motorista.

Bisan og iya pa sa kagamhanan ang maong sakyanan, dili kana basehanan nga hatagan lang gihapon og pagtugot nga makadagan-dagan kay mora’g katumbahon na hapit.

Dinhi sa dakbayan sa Sugbo, daghan kaayo ang mga susama niining maong kalidad sa sakyanan.

Mga sakyanan nga kon magsunod ka, mapuno sa anuos ang imong ilong kay nagbuga man og itom kaayong aso.

Unta, kon makasugod na pagtigum ang mga sakop sa Cebu City Traffic Management Board, kahisgotan kining mao nga isyu aron mahatagan na og pagtagad.