Ikiha ninyo

Dunay mga kapitan sa kabarangayan nga nangreklamo kay mitapos na lang ang tuig ug wala pa sila hatagi og cash assistance gikan sa kagamhanan sa Dakbayan sa Sugbo.

Ang rason niini kay ang ilang barangay wala makahatag og kwentada kun giunsa paggasto ang cash assistance nga gihatag ngadto sa ilang mga barangay sa milabay’ng katuigan.

Ang lagda sa Presidential Decree 1445, nga gitawag sa uban og Government Accounting and Auditing Manual (GAAM).

Gilatid gyud sa balaod nga ang usa ka buhatan, o ahensya sa kagamhanan, dili mohatag og dugang cash assistance ngadto sa mga kawani ug opisyal sa gobiyerno, apil na gani ang mga Non-Government Organizations, kon wala pa sila makahatag og kwentada sa gihatag kanila sa miaging tuig, o katuigan.

Mao kana ang rason ngano nga ang Cebu City Treasurer’s Office wala mohatag og dugang cash assistance sa mga barangay nga napakyas paghatag og accounting sa ilang previous nga cash assistance.

* * *

Tukma ang gihimo ni Inayawan Barangay Captain Kirk Brian Repollo nga gipasakaan niya’g kaso sa Ombudsman ang kanhi kapitan nga wala makahatag og kwentada kun giunsa niya paggasto ang cash assistance nga gihatag ngadto kaniya kaniadto.

Ingon niini ang angay’ng himoon sa ubang mga kapitan nga ikiha ninyo ang gipulihan ninyo nga mga opisyal kon sila napakyas paghatag og kwentada sa cash assistance nga nadawat nila kaniadto.

Kun dili ninyo kini himoon, masakripisyo ang katawhan sa inyong mga barangay nga dili na makadawat og dugang cash assistance gikan sa kagamhanan sa siyudad.

Para kanako, husto man ang gihimo sa mga opisyal sa Dakbayan sa Sugbo kay kon padayon ra gihapon sila nga mohatag og cash assistance bisan og ang barangay wala makahatag og kwentada sa ilang previous cash assistance, mahimo nga sila ang manubag sa Commission on Audit.

Usbon nako, ikiha ninyo ang mga kapitan sa barangay nga wala gyud makahatag og kwentada sa ilang nadawat kaniadto nga cash assistance.

Nganong dili man sila makahatag sa mga gikinahanglang dukomento?

* * *

Mas dako ang “target revenue” nga gustong kolektahon sa kagamhanan sa Dakbayan sa Sugbo gikan sa business tax, apan gamay ra sa real property tax.  

Wala gyud ko malimot sa gisulti kanako sa dakong opisyal sa Bureau of Local Government-Finance (BLGF) nga ang real property taxes maoy giisip nga “life blood” sa usa ka Local Government Units.

Sa kadaghan karon sa mga building nga nanuyhakaw, gamay ra gihapon ang atong real property tax?

Ang real property tax mao ang buhis gikan sa building, kayutaan ug mga makinarya sama sa elevator, escalator ug mga generators.