Dear Atty. Divine,
Ang akong iyaan way anak ug gusto siya nga mosagop og bata. Dunay among silingan nga bag- o lang nanganak ug misugot siya nga sagupon ang iyang anak sa akong iyaan. Apan tungod kay wa pa marehistro ang bata, misugyot ang inahan sa bata nga ang akong iyaan na lang ang moparehistro niini ug ang iyang pangan na lang ang ibutang isip inahan sa bata ug ang iyang bana maoy ibutang nga amahan aron di na sila moagi sa Korte. Ang akong pangutana kun wa bay kriminal nga tulobagon ang akong iyaan ug ang iyang bana kun ilang irehistro ang bata ubos sa ilang pangan? Daghang salamat. —Gina
Dear Gina,
Usa ka kalapasan sa balaod ang pagabuhaton sa imong iyaan pagrehistro sa bata ubos sa ilang pangan. Gitawag kini og Simulation of Birth ug usa kini ka criminal offense ug pwede silang mapasakaan og kaso. Busa kun gusto nga sagupon sa imong iyaan ang bata mas maayo nga himoon kini niya sa legal nga pamaagi pinaagi sa pag-file og Petition for Adoption sa Korte aron malikayan ang problema sa umaabot. So ang bata kinahanglan gyud nga irehistro ug ang ibutang nga inahan ug amahan niini mao ang iyang matuod nga biological parents. Kun ma-grant na ang Petition for Adoption mausab na unya ang Birth Certificate sa bata lakip na ang iyang apelyido. Thanks and God bless. —Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.