Abuso batok kaluoy

Si Cebu City Mayor Edgar C. Labella nailhan na sa iyang pagkamanggiluy-on sa mga sidewalk vendors. Gani, bisag gimandaran na ni Presidente Rodrigo R. Duterte ang Department of Interior and Local Government (DILG) nga palimpiyohan na ang mga aseras o daplin sa dalan nga hagbay rang giokupar sa mga badlongong mamaligyaay, gibati mag kalisod ang mayor sa hugtanayng pag-implementar niini.

Napugos lang siya sa paghimo niini dihang gihatagan silang mga mayor og deadline sa pagtuman sa sugo sa presidente nga ibalik na sa katawhan ang aseras ug sidewalk, diin imbes lugar nga agianan sa manglabay, gilubloban na hinuon sa mga manindahay sulod sa daghang katuigan nga gi-enjoy nila ang kaluag sa pagpamunoan nga nahatag sa mga nangaging mayor sa City Hall.

Unsaon, dili man gyod kalikayan sa usa ka politiko ang kahadlok nga mawad-ag solidong botos gikan sa mga vendors inig abot sa eleksiyon. Kay sagad, mao baya ni ang gigunitang alas sa mga vendors, kinsa maayo motimaan sa unsay gibuhat sa mayor kanila.

Mao nga gipaagig diplomasiya ni Labella ang pagpahawa sa mga vendors sa sidewalk ug aseras. Gani, hapit na lang siya moluhod sa pagpasabot sa mga gahi, nga igo lang siyang mituman sa mando ni Duterte.

Dinhi, akong naklaro, nga si Labella aduna gyu’y kasingkasing nga kaantigo maluoy sa mga vendors.

Mura siyag sulugoon nga nagsilbe og duha ka agalon sa samang higayon: ni Duterte ug sa vendors. Ug dili sayon ang pagpangitag paagi nga matuman niya ang giyangongo sa duha, sa diskarte nga walay bisan usa nga masakitan.

Bilib na man ta ko ni Labella dihang milampos gyud siya paglimpyo sa mga aseras sa siyudad. Abi nakog diretso na to. Gipabalik ra man sab niya dayon ang uban, uy! Unya, iya pa gyong gitugtan ang mga vendors nga makapamaligya sa night market tungod lagi sa iyang kamaayong tawo, kamanggihunahunaon  ug kaminggiluy-on.

Pero unsa bay gibawos sa mga vendors ngadto niya? May pipila nga gibaligya ilang rights ngadto sa mga private individuals aron makakuwartag dako. Pagkawalay kaikog!

Ning ilang gibuhat, di na maayo nga tugtan pa silag balik pagpaninda sa aseras. Kay ang dakong kaluoy ni Labella, gisuklian lag nilag pangabuso.