Pagsulbong og balik sa lana
Samtang wa pa mopahibawo ang mga kompaniya sa lana kanus-a sila mopahamtang sa ikatulong sunudsunod nga hugna sa umento sa buhis sa lana, seguro na nga dunay dakong saka sa presyo sa mga produkto sa lana dayong bag-ong tuig sunod semana.
Mahimong mao na ang pasiuna sa pasidaan sa mga eksperto sa industriya sa pagsugod na sab og sulbong sa presyo sa mga produkto sa lana sunod tuig.
Nipasabot sila nga kon mahusay ang gubat sa patigayon tali sa China ug Estados Unidos, mobaskog ang kalibotanong ekonomiya ug mosaka ang konsumo sa lana.
* * *
Gipahibawo sa kadagkoan sa Department of Energy (DOE) nga ang kinadak-an nga umento mahiagoman sa mga konsumidor sa krudo, nga maglakip sa kasagaran sa mga sakyanan nga pamasahero.
Maong gikahadlokan nga makaigo natong tanan kay mahimong mosangpot sa mas taas nga plitehan.
Kini tungod sa pagkonsumo na sa mga barko og krudo, inay bunker fuel, aron pagtuman sa lagda sa pag-iban sa kahugaw sa aso sa ilang mga makina sugod sa bag-ong tuig. Tungod sa kalit nga pagsulbong sa demanda sa krudo, mosulbong sab ang presyo ini.
* * *
Gawas sa pagsalig nga mohunong na silang US President Donald Trump ug Chinese President Xi Jinping sa pagbawosanay og bunal og dagkong buhis sa ilang mga produkto, gipangagpas sab sa mga eksperto ang pagtidlom na sa produksiyon sa shale oil sugod sa sunod tuig.
Kon di na magbaha ang shale oil, nga maoy nakapugong sa pagsulbong sa presyo tungod sa laslas sa produksyon sa lana sa Saudi Arabia, Russia ug ubang kanasuran, mahimong makabuylo na gyong pagmahal sa lana.
* * *
Abunda hinuon ang pagduda unsa kamapuslanon ang kauyonan nga giumol sa mga representante sa duha ka higanteng ekonomiya.
Kay gihulagway nga gidalidali pagpanday ang pasiunang kauyonan aron lang makatabang sa pagdaog ni Trump sa piniliayng presidensiyal sunod tuig.
Gikabalak-an hinuon nga ang bisan unsang kasamtangan nga kadaogan nga makuha ni Trump gikan sa usa ug tunga ka tuig niyang panghudlat ni Xi kuwang rang itapak sa mas dakong pilde sa mga ekonomiya di lang sa Estados Unidos ug China kon dili sa tibuok kalibotan tungod sa wa kinahanglanang away nga iyang gisugdan.
* * *
- Latest
