Pagkapait nga Bag-ong Tuig sa mga drayber sa Angkas human nga ang Land Transportation Franchising and Regulatory Board nagbutang og limitasyon sa gidaghanon sa mga drayber sa maong app-hailing company sa sunod tuig.
Gawas sa mga drayber nga mawad-an og trabaho, posibleng maapektaran sab ang mga sumasakay nga naanad na pagsakay og Angkas kay paspas ang biyahe kun itandi sa ordinaryong mga de pasaheroan.
Sumala pa nga gibanabanang 17 mil ka mga drayber sa Angkas ang kinahanglang tangtangon subay sa limitasyong gihatag sa LTFRB nga 10,000 ra gyud ka drayber ang naa sa Angkas.
Dako kaayo kining pahat sa kasamtangang pwersa sa mga maghatud og pasahero. Kun itandi ang Angkas sa app-hailing transport companies sama sa Grab, dako kaayo og deperensya sa plite.
Ang Angkas ubos pa gihapon sa obserbasyon subay sa pilot program sa Department of Transportation nga naghimo og pagtuon kun unsa ka luwas sakyan ang motorsiklo isip pasaheroan.
Tinguha sa DOTr nga dili lang ang Angkas ang ekslusibong motorcycle for hire nga mag-operate dinhi sa nasud kondili giimbitar sab ang ubang kompanya pagsalmot.
Ang pilot implementation napupos na unta sa miaging buwan apan gihatagan og lugway nga unom ka buwan hangtud sunod sa tuig aron makasalmot ang ubang kompanya.
Ang DOTr nipahibalo nga 39 mil ka mga rehistradong motorsiklo ang apil sa maong pilot implementation ug tag 10 mil ka motorsiko matag Transport Network Company (TNC) sa Metro Manila.
Hinuon, dili angay maguol ang mga Angkas drivers nga mataktak kay dunay may bag-ong TNC nga JoyRide ug Move It nga mahimo nilang kabalhinan.
Sa pagkakaron ang Angkas maoy nasilbing paspas nga alternatibong transportasyon sa minilyon ka mga pasahero matag adlaw.
Mas maayo nalang kini nungka sa wala kay hangtud karon wala pay kasigurohan ang ubang mga transport systems nga gisaad sa gobiyerno.