Pagkohanong katahom nahibalik

Nausab na gyud ang hitsura sa panahon. Kaniadto, pagsulod pa lang sa unang adlaw sa Ber-month, may madungog ka nang awit sa Pasko nga ipatokar sa radio stations. Ikaw nga makadungog, kalit lang malipay nga mahinumdom sa kagahapon, diin niadtong bata pa, naggakos sa daghang regalo nga gikan sa mga Ninong ug Ninang nga nagmahal.

Pagkatahom paminawon sa nagpanawag nga bagting sa lingganay dungan ang tuktugaok sa manok panahon sa Misa de Gallo, diin ang daplin sa dalan ug kabalayan nag-indigay sa kaanindot sa nagkalainlaing Paskohanong dayandayan.

Apan karon, bisag Disyembre 17 na, sa pagsulat niini, wala gihapon koy nadungog nga Paskohanong awit nga gipatugtog sa among mga silingan. Yaya sa akong apo, kada adlaw mo-tune-in og music radio stations, pero wala koy nabati nga Christmas songs. Tingale, kun may nagpatokar, diyotay ra. Ngano kaha?

Dili kaha tungod sa economic crisis? Water crisis? Political crisis? Ug Spiritual crisis? Angay hinumdoman nga ang mapatuyangong paglawig sa excise tax, ang grabeng naapektohan, mga kabos lang gihapon.

Ang kakulang sa suplay sa tubig maoy nakadugang og laing pag-antos sa mga timawa. Ang panagbikil sa ambot, dili gyod magkasinabot ug magkahiusa nga mga lider sa gobiyerno, ma-local man o national, nga mosangko ngadto adlaw-adlawng panaglalis-away.

Ug labaw sa tanan, ang kawala nay respeto sa tawo ngadto sa atong Ginoo ug nahikalimot nga kita Iyaha diayng templo ning kalibotan.

Kining tanan, maoy nakapalaksot sa kanhi maanyag nga diwa sa Pasko nga makita sa palibot, kadalanan, kabalayan ug mga mapahiyomong anino nga milarawan sa matang sa kalipay nga ilang gibati. Ang dalan V. Rama, siyudad sa Sugbo, anaa ning maong agos sa katahom. Apan pagkamayor ni Tommy Osmeña, kini nahunong. Busa, igo na lang sa paghandom ang katawhan kada tuig nga magsingabot ang Pasko.

Maayo na lang, kay nakahunahuna si Mayor Edgardo Labella ug Bise-Mayor Michael Rama nga ibalik ang Indigay sa panindotayg adorno sa Dalan, Balay, Establisamento ug mga Parol, diin ang makadaog, makadawat og premyong salapi.

Daghang nangalipay. Daghang relihiyoso ang nagpasalamat sa Kahitas-an. Kay human sa tulo ka tuig nga kamingaw, ang paskohanong katahom sa dalan V. Rama nahibalik. Good job, Ed and Mike. Keep it up!