Ang paambit ni Rev. Leo

Dunay seminarista nga nadestino sa akong kanhi nga parokya sa Mohon Sogod. Siya mao si Leo Estomagolang. Niadtong Disyembre 4, 2019 sayo sa buntag nitikang ko sa Dumaguete kuyog silang Tito, Nang Aring ug Faith. Among tumong mao ang pagtambong sa ordinasyon ni Leo sa Pagkadyakono. Ang bagyo nga si Tisoy wa gyud kapugong ning talagsaong hitabo. Nahuman ra gyud ang maong kasaulogan. Sa dihang gihimo na ang pagpasalamat, makapatandog kaayo ang giingon ni Leo nga nagtinampohay kuno ang mga pari sa iyang pagtungha sa seminaryo. Sa laktod nga pagkasulti nahimong pass the hat ang show. Butang nga makapadasig sa usa ka seminarista nga nagkalisud nga bisan pa man sa tanan anaay mga tawo o mga kaigsuonan nga nagpaluyo aron moabiba. Sa Diocese sa San Carlos gitawag kini og Obonto nga nagpasabot og: “Wa gyuy mabiyaan!” Ang tanan magkuyog gayud diha sa panaw.

Usa sa mga nindot pamalandongan ning panahon sa Adbiyento mao gyud baya ang pagkamanggihatagon. Ang Dios baya sa iyang dakong gugma nahimong manggihatagon sa iyang Bugtong Anak. Ang Anak gani mismo nagtudlo man sa bili sa pagkamanggihatagon pinaagi sa pag-una daan sa uban kaysa iyang kaugalingong panginahanglan. Gani ang mga milagro nga gihimo man tungod kay dunay panginahanglan. Mao nga nahimo siyang pinangita tungod kay iyang gitagbaw ang panginahanglang lawasnon ug kalagnon sa mga tawo nga nisunod sunod kaniya. Sa laing bahin, samtang akong gi scan ang akong FB Account akong nakita ang speech ni Sen. Manny Paquiao nga nipadayag sa iyang kasagmuyo gumikan sa sistema sa pamolitika dinhi sa Pilipinas. Alang niya, daghanan sa mga politiko ang kaugalingon lamang ang gihunahuna. Kay imbis ipadayon ang bisan unsang nindot ug makaayo sa kadaghanan, mas palabihon pa man nuon ang pagpakgang niini kay lagi dili man sila kaalyado ug labaw na nga dili man nila proyekto. Mao nga di ikalimod nga DAGHANG PROYEKTO WAY HUMAN-HUMAN kun DPWH. Kay lagi dunay uban nga dili buot padayonon ang bisan unsang nasugdan.

Ang pagtinabangay mahitabo lamang kun himoong maumol sa hunahuna ug kasingkasing sa tawo kining mosunod:

1. Ang tanan dili atoa gani ato raman gihapong biyaan ang tanan nga nia nato. Gipahimugso tang hubo ug mamatay kitang mag-inusara ug mamahimong hubo.

2. Ang si bisan kinsang tawo bililhon kaysa bisan unsang kabtangan o bahandi. Tabangon ang tawo gamiton ang salapi.

Ang kasinatian ni Rev. Leo pahinumdom lamang nga way dili posible kun magtinabangay lang gyud ang tanan bisan pa man sa ginagmay o dinagko nga tampo. Kini maoy nakapahimong makahuloganon sa atong pagsaulog sa Pasko sa Pagkatawo sa atong Ginoo. Ang pagpanghatag dili lang sa atong mga bahandi kondili ang pagpanghatag sa atong gugma ug kamaayo ngadto sa uban….Unta kini makapadasig kanato sa hilabihan adlaw adlaw sa atong kinabuhi. Mao alang kang Rev. Leo ug Banjo padayon kamo sa pagkamanggihatagon sa inyong mga kaugalingon.