Mismo na si Pres. Rodrigo Duterte ang nangayo og pasaylo sa mga delegado sa 30th Southeast Asian Games tungod sa mga kapalpakan ug misaad kanila nga dunay manubag niini bisan og iyaha pang kaalyado.
Giangkon ni Duterte sa ilang atubangan nga wala malipay ang gobiyerno sa Pilipinas sa nahitabo, mao nga ini og kahuman sa maong kalihokan dunay himuong imbestigasyon ug apilon bisan iyaha pang kaalyado. Nag-unang kaalyado nga posibleng mabutang sa tadtaran way lain kondili si House Speaker ug chairman sa Philippine Southeast Asian Games Organizing Committee Alan Peter Cayetano ug iyahang mga sakop.
Samtang tuod wala magduda si Duterte nga nangurakot si Cayetano, apan gusto sa presidente nga dunay himuong audit kun asa ug unsay gigamitan sa P6.5 bilyones nga pundo alang sa malampusong SEA Games. Apan sa pagsugod palang, daghan nang mga kapalpakang nadunggan ang presidente mao ingon niana iyang kasagmuyo sa nahitabo.
Si Cayetano padayon sa pag-insister nga dunay mga tawong gusto lang gyud dauton ang Pilipinas ug pakauwawan si Duterte pinaagi sa pagpanaway ug pagtutok lang sa mga sayop nga nakita ug paghimo og mga fake news diha sa social media.
Posibleng dunay punto si Cayetano sa iyang pasangil tungod kay kanus-a pa man gud nahitabo nga dunay gobiyerno nga way kritiko?
Apan kun ang pasanginlan ang mainstream media maoy nagpasiugda sa pagbalita og mga kapalpakan, diha nasayop ang uban.
Kay sa nanggawas nga mga balita, ang mismong mga bisitang atleta ang unang nangreklamo ug nasundan sa pipila ka lokal nga mga atleta.
Ang mga reklamo nagagikan sa transportasyon, hotel accommodations, kapilian nga pagkaon, ug mga wala pa mangahuman nga sporting venues.
Kun wala pa kini gibalita sa mainstream media, dili kini maabot sa dunggan ni Duterte. Tan-awa, nagkinto na karon ang mga organizers.
Naa kanunay ang suporta sa tibuok katawhang Pilipino sa Philippine Team, wala kini kwestyon.
Gusto sa tanan nga molampos ang Pilipinas pag-host niini, apan unsaon paglampos kun dili sawayon ang mga kasaypanan?