Ang arka ni Noe

DISYEMBRE 1, 2019: Unang Domingo sa adbiyento

Mga Pagbasa:  Is. 2;1-5/Sal. 122/

Rom. 13;11-14/Mt. 24;37-44

Niadtong bata pa ko, gitudloan mi og kanta sa among katekista. Gani hangtud karon wa gyud ko kalimot tawon ning maong awit. Ang maong awit o kanta nagkanayon:

Nagbuhat si Noe og Arka! Nagbuhat si Noe og Arka! Nagbuhat si Noe og Arka kay gisugo man sa Dios!

Mibundak ang ulan ug nibaha, nibundak ang ulan ug nibaha, nibundak ang ulan ug nibaha ang arka ni Noe naglutaw lutaw!

Ang arka naglutaw lutaw! Sa mga balod nagpaibabaw!

Ang arka naglutaw lutaw kaysa Dios man gitan-aw!

Misinggit ang mga paryente ni Noe! Noe! Pasakya kami kay malunod na kami!

Nindot ang maong kanta apan sa laing bahin dunay pagtulon-an nga angayan natong hinuklogan labina kun maghisgot kita og pag-anhi sa atong labaw nga makagagahum, nga mao unya ang adlaw sa panghukom alang kanato. Angay ba  kitang malisang?

Sa panahon ni Noe siya lamang ang naluwas ug ang iyang pamilya tungod kay gawas nga ligdong siya nga pagkatawo nahimong matinumanon siya sa mga sugo sa Dios.

Bisan pa man kun nahimo siyang kataw-anan alang sa mga tawo sa iyang kapanahonan tungod kay naghimo man siya og arka sa yutang mamala, apan padayon gihapon si Noe sa paghimo niini sanglit mao man ang gimando sa Dios alang kaniya.

Karong panahon sa adbiyento, atong gisugdan ingon nga simbahan ang hataas nga pagpangandam sa pag-anhi sa atong Ginoo. Atong gihandum uban ang dakong kalipay ang iyang unang pag-anhi sa dihang siya nahimong usa ug sama kanato diha sa iyang pagkahimugso gikan sa sabakan sa mahal nga inahan. Ikaduha, atong gipangandaman uban ang pagkamaigmaton ang iyang ikaduhang pag-anhi kang kansang panahon wala kitay kasayuran pa sanglit ang atong hunahuna limitado raman kaayo sa pagtugkad ning maong misteryo.

Ning maong kasaulogan atong himoon ang pag-review mismo sa atong kinabuhi.Atong himoon ang pagtuki sa atong mga binuhatan gikan sa Enero hangtod karong bulana ning tuig 2019. Naduol ba kita sa Dios o mas nalayo pa ba nuon kita gikan kaniya gumikan ra usab sa atong mga binuhatan. Gi omit ang Gloria dili tungod kay nagmasulob-on kita, gi omit kini aron ang tanang kalipay matingob sa pagsaulog sa iyang pagkatawo.

Ang adbiyento kun pag-abot pahinumdom alang sa matag usa kanato nga ang Dios dili diay Dios sa halayo kondili Dios nga duol gyud kaayo alang nato. Busa matarong lamang nga ato kining saulogon uban ang kabag-o. Sinugdanan kini alang sa dalan nga magdala kanato sa atong kaluwasan, kasaulogan nga naghatag og bili sa matag usa kanato ingon nga mga anak sa Dios nga padayong buhi ug naghatag kanato og kinabuhi. Happy New Year kanatong tanan, ning bag-ong tuig sa atong Pagkasimbahan.

ATONG AMPOON KINING MAONG PAG-AMPO

Makagagahum nga Dios, itugot sa mga nagtuo kanimo nga madugangan ang ilang kusog sa kabubut-on alang sa pagbuhat og maayo aron sa ilang pagsugat kang Cristo nga taliabot, mahimo silang takus sa paglingkod sa iyang tuo diha sa gingharian sa langit!  Amen!