Buhi sa kanunay

Nobiyembre 10, 2019: Ikakatloag-Duha
nga Domingo sulod sa tuig

Mga Pagbasa:  2 Mac. 7;1-2,9-14

/Sal. 17/2 Tes. 2;16-3;5/Lk. 20;27-38

Kaniadto nahimong balansayon ang Levirate Marriage. Nagpasabot kini nga kun pananglit ako usa ka minyo ug namatay nga walay anak ang akong igsuon o dili ba kaha ang akong ig-agaw nga lalaki kinahanglang mangasawa sa akong biyuda.

Kini aron sila makapanganak alang nako kay kun wala akoy anak mahimong mapapas ang akong ngalan gikan sa talaan sa among kaliwat. Sa mas praktikal nga paagi kinahanglang pangasaw-on ang biyuda alang sa iyang kabuhian ug ekonomikanhong seguridad. Kining maong balansayon maoy gihimong sukaranan sa mga Saduseo sa pagbiaybiay sa pagtuo kalabot sa kabanhawan.

Ang pangutana kung kang kinsa man siyang asawa nga silang tanan nakapangasawa man kaniya? (Ang pito ka mga managsuong lalaki). Apan gitataw ni Jesus nga kining maong pangutana out of the question na kay sa panahon sa kabanhawan dili na isyu ang pagminyoay ang tanan magpuyo lamang ingon nga mga managsuon lamang.

Ning maong pagtulon-an kita gipahinumdoman:

1. Ang kamatayon dili katapusan. Ang kamatayon usa ka sinugdanan alang sa laing hugna sa pagkinabuhi nga mao ang kinabuhing dayon. Namatay kita aron masinati nato ang kabanhawan. Pinaagi sa maong kamatayon anaa ang kinabuhing dayon.

2. Ang tinud-anay nga bahandi anaa sa mga butang espirituhanon busa matarong lamang nga atong gamiton ang bisan unsang butang lumalabay aron makab-ot nato ang kinabuhing tunhay.

3. Ang kinabuhi sa kalibutan hamubo ra gyud busa di maayong pasipad-an. Hinunoa gamiton unta nato kini alang sa paghimaya sa Dios ug sa pag-alagad sa uban!

4. Happy Sunday Everyone! Nagpasabot kini nga sa ato pa angayan lamang nga saulogon nato ang gasa sa kinabuhi sa paagi nga madagayaon ug malipayon! Kay pinaagi lamang sa maong panagkuyog nato uban sa atong mga mahal sa kinabuhi makita nato ang bili sa kinabuhi. Ang Dios ang tag-iya busa ang Dios lamang maoy dunay katungod sa pagbawi niini.

5. We are meant for greater things mao bitaw nga gipahimugso kitang tuyhad diha sa atong linaktan ug barog kini tungod kay lawas lamang nato ang angayan lamang sa yuta samtang ang atong espiritu alang sa Dios nga maoy naghatag niini kanato busa ayaw usiki ang imong kinabuhi sa mga way hinungdang binuhatan. Ug labaw na nga ayaw panamastamasi ang kinabuhi sa uban.