Nadutlan na sa karma???

Gumikan sa nag-alintabo nga pagsaway sa mga netizens sa mga kahiwian nga nahimo sa mga manindahay og lechon sa dakbayan sa Carcar, upat ka lechon stalls ang gipasirad-an mismo ni Mayor Mercy Apura.  Matud sa Mayor, ang pagsira sa maong mga stalls mahulagway nga pagsakripisyo kanila aron matabang pa ang negosyo sa ubang manindahay og lechon. Maingon ba nato nga nadungog na gayod ang mga “bakho ug dangoyngoy” sa mga customer nga nabiktima sa ilang mga tinonto? Karma pa more?

Alimoot nga ordinansa

Sugdan na sa kagamhanan sa Pasay City ang hugot nga pag-implementar sa napasar nga ordinansa nga nagdili sa ilang mga residente pagsuroy-suroy palibot sa dakbayan nga maghukas sa ilang sinina sa ibabaw’ng bahin sa lawas. Sayod kita nga ang sagad nga rason ngano maghukas ang tawo mao ang naghingapin nga kainit sa panahon. Dili kaha maayo nga inay multa ang ipahamtang sa mosupak, hatagan na lang siya og gamay nga electric fan? May pagka-alimoot ang maong ordinansa!

“Paleho la!”

Sa paglabay sa unom ka tuig human ang Kabisay-an gikuso-kuso sa Bagyong Yolanda, naobserbahan sa Office of the Civil Defense-Visayas nga wala gihapon masilsil sa hunahuna sa katawhan ang mga pagtulon-an nga angayan makutlo sa maong panghitabo.  Kon tinuod ang maong obserbasyon, nagpasabot ba kini nga gahi ug ulo ang katawhan o kulang lang gayod ang gibuhat sa kagamhanan aron mapanagan-an ang maong matang sa katalagman? Tubag pa sa Intsik, “Paleho la”!

Nalikoy na pud ang isyu

Gikataho nga ang tulo sa upat ka miyembro sa MCWD Board nga gitaktak sa ilang katungdanan ni Mayor Ed Labella, mipasaka ug kaso batok kaniya sa rason nga ang pagtaktak kanila wala’y balido nga hinungdan ug wala usab mahasubay sa gitawag nga “substantive ug procedural due process.” Niining maong kalambuan, malikoy na usab ang matuod nga isyu nga mao ang kakulangon sa tubig. Inay sulbad sa suliran ang pangitaon, magkapuliki na unya ang mga hingtungdan pagpangita sa legal nga depensa sa ilang personal lamang nga kawsa.  Wa gihapo’y agas ang gripo!

Quitter never wins

Segun sa balita, kapin sa 500 ka ‘Bar Candidates’ ang wala motumaw sa unang adlaw pa lang sa Bar Examinations.  Kahadlok ug kabalaka ang sagad nga hinungdan ngano nga dili modayon ang usa ka bar candidate sa pagkuha sa examination. Niining maong kahimtang, nahagbong na daan ang bar candidate bisan wala pa ang resulta sa bar examination.  Kausik sa iyang pagpangandam!