Major Barandog adviser na’s mayor

Nalipay ko nga gitudlo ni Cebu City Mayor Edgar Labella si Police Major Chuck Barandog isip iyang adviser sa pagdumala niya sa Regional Peace and Order Council (RPOC) sa Central Visayas.

Dili malalis nga daghan na kaayo og kasinatian si Barandog ug pinaagi sa iyang mga tambag ngadto kang Labella kabahin sa pagpalambo sa peace and order, malampuson si Labella sa iyang katungdanan.

Daygon nako si Barandog kay gawas sa iyang katungdanan didto sa Philippine Charity Sweepstakes Office (PCSO) uban ni Koronel ug General Manager Royina Garma, makatabang usab siya dinhi sa rehiyon.

* * *

Nindot kining mga balita alang sa mga senior citizens nga kon maaprobahan na gani ang ordinansahon ni Konsehal Jun Gabuya, dili na sila mahadlok nga matangtang gikan sa listahan sa OSCA bisan og dili sila makakobra sa ilang cash assistance katulo ka sagunson nga higayon.

Ang lagda gud karon nga kon ang usa ka senior citizen dili makakobra sa sagunson nga mga pagpanghatag sa cash assistance, ang ilang ngalan tangtangon sa listahan sa OSCA.

Gipasabot ni Konsehal Gabuya nga dili man gud kalikayan nga ang usa ka senior citizen imbitahon sa ilang mga anak nga tua nagpuyo sa lagyo nga lugar sa nasud, ang uban gani tua sa gawas, mao nga dili gyud sila makakobra.

Ang ordinansahon ni Gabuya nga pending pa sa Cebu City Council mao nga dili lang tangtangon ang ilang mga ngalan, apan dili na usab ihatag ang ilang mga cash assistance nga wala nila makolekta lapas sa 10 ka adlaw gikan sa pagpanghatag.  Oki ba mo mga seniors?

* * *

Gisukna diay ko sa akong amigo kon dakpon pa ba diha sa Mandaue City ang mga magmotor nga magsul-ob og full-faced helmet, ug magmaskara nga dili makita ang panagway sa motorista.

Wala tingali sila makabasa sa akong lindog kaniadto. Wala na ang ordinansa nga gigama kaniadto sa kanhi mayor nga giisip nga anti-motorist. Paglingkod ni Mayor Jonas Cortes,  iya dayon nga gipalihok ang mga konsehal nga pulos niya kaalyado, nga i-revoke ang ordinansa,

Natan-aw man gud ni Mayor Cortes nga ang pagsul-ob og maskara sa mga magmotor gitumong aron dili sila makahanggap og itom kaayong aso gikan sa tambutso sa mga sakyanan ug ingon man abog.

Wala gyud to’y pulos ang ordinansa sa kanhi mayor sa Mandaue kay bisan og gidid-an na ang mga magmotor nga magmaskara ug pagsul-ob og mga helmet nga matabonan ang ilang mga nawong, dunay mga panghitabo nga krimen nga naglambigit og nagmotor, wala man gihapon lagi madakpi?