Bisan sa pasidaan sa Philippine Institute of Volcanology and Seismology (PHIVOLCS) nga mahimong may mosunod pang mga linog sa tungatungang Mindanao tungod sa kadaghan sa padayong naglihok nga mga kang-a ug hulpa sa yuta, wa silay katakos ug teknolohiya sa pagtakda kanus-a mahitabo ang sunod nga mga linog.
Igo lang ang PHIVOLCS nga makabanabana sa gikusgon sa mosunod nga mga linog, mahimong hinay ra nga igo lang mabatyagan apan mahimo sab nga mas kusog pa kay sa tulo ka sunodsunod nga pagtay-og nga pulos nasentro sa Tulunan, Cotabato sa niaging buwan.
* * *
Maong di makatabang alang sa nagbangotan nga mga namatyan ug ubang mga biktima sa mga linog sa Mindanao ang pagtabang pagpakatap sa social media o sa text messages ang ang mga pasidaan nga may mas kusog pang mga linog nga magda og makalilisang nga tsunami karong semanaha.
Utrong iresponsable ang pagsakay sa nagpatuong lider sa relihiyon nga nangangkon nga ang labing naigo maong mga dapit nga nagpasakop sa karibal nga relihiyon ug nga mas taas pa unta ang kataposang linog kon wa pa mopatuo ang kinaiyahan sa iyang sugo.
* * *
Hinaut nga mapatuman ang sugo sa Department of Interior and Local Government (DILG) sa pagsusi sa tanang istruktura kon nakatuman ba sa mga lagda sa National Building Code (Republic Act No. 6541) aron nga mapalig-on ang huyang nga buildings sa di pa maigo sa mosunod nga mga linog.
Hinaot nga tinud-on sa mga sakop sa Kongreso ang pagsubli sa bahaw nang mga probisyon sa 47 anyos nga balaod aron nga mas mapahaom sa bag-ong panahon.
* * *
Hinaut nga ang sugo sa DILG ipatuman di lang sa Mindanao kondili hasta na sa Sugbo ug Kabisay-an ug ubang bahin sa nasud. Nakasinati na tuod ta og mas kusog nga mga linog sa nangaging katuigan apan wa gyu’y lapad nga pagsusi sa kalig-on sa tanang istruktura.
Gani, nagpadayon ang sibaw nga mga pasangil nga may pipila ka building officials sa mga lungsod ug mga dakbayan nga mas ganahang modawat og padangog ug molingiw kay sa pagpatuman sa balaod. Karong bag-o, bisan ang kusog nga mga uwan, nga di sama kakahadlokan sa linog, nakapa-apiki sa pipila ka buildings.