Dili tanan kontra

Mismo si Presidente Rodrigo Duterte nagtuo nga mga polis ray mi-ambush patay ni Clarin, Misamis Occidental Mayor David Navarro. Tungod sa iyang katahap, gimando sa presidente nga itugyan ang imbistigasyon ngadto sa National Bureau of Investigation. Ang NBI dinhi sa Central Visayas mihulma na og team nga mohimo sa imbistigasyon. Lakip sa ilang tan-awon kinsa ang mga responsable ug unsay ilang motibo.

Ug tungod sa pagduda mismo ni Duterte sa mga polis, dili ko matingala kun mamahimong sentro sa imbistigasyon sa NBI ang kapolisan. Hinaut lang nga dili ni maghaling og panagbangi tali sa duha ka ahensiya sa gobyerno.

* * *

Kun tinuod ang pagtahap sa presidente, angayang malisang ang mga responsabli. Suod ni Duterte ang pamilya ni Navarro tungod kay mao ni usa sa iyang lig-ong political organizers didto sa Mindanao sa miaging election. Ang pagpanghilabot sa Malacañang niining maong kaso igo na nga sukaranan aron mobarog ang balhibo sa mga nalambigit. Ug kun tinuod man ang pagtuo sa kadaghanan nga ang pagkalakip ni Navarro sa listahan sa mga politiko nga giingong nalambigit sa drugas ang motibo, usa ka leksiyon ang angayang makat-onan sa mga responsabli: Dili tanang nalakip sa lista kontra ni Duterte.

* * *

Sayo pa alang sa 2022 nga eleksiyon, apan inanay na nga naklaro ang badlis sa politika tali nilang Mayor Edgardo Labella ug Bise Mayor Michael Rama. Bisan sa pamahayag ni Labella nga nagpabiling lig-on ang iyang relasyon uban ni Rama, apan di ikalimod ang pagkasi-ak niini human moluwat ang bisi mayor isip chairman sa Sinulog Foundation, Inc. Ug dunay rason si Rama nga mangluod tungod sa wala pag-imbitar niya sa tigom sa Cebu City Sinulog Governing Board.

Isip tsirman sa SFI nga direktang nalambigit sa preparasyon sa Sinulog, angayan untang giimbitar sa tigom si Rama bisan respitar nalang. Kun nakahimo si Labella pagpangimbitar nilang Presidential Assistant for the Visayas Mike Dino ug Kenneth Cobonpue ug sa uban pa nga didto mitambong sa tigom, way rason alang niya nga di imbitahon ang iyang bise mayor.

Busa dili na ko matingala kun dunay mahitabong kausaban sa panag-alyansa diha sa konseho sa dakbayan sa mosunod nga mga adlaw. Mosunod kaha ang pagbuwag na sa alyansa sa BARUG, ang partido ni Rama, ug sa PDP-Laban? Posible kaha ang panag-uban sa BARUG ug BOPK diha sa konseho? 

Kun si Labella maoy magsilbing kumon nilang kontra, dili imposible nga mahitabo ang panagkuyog og balik sa grupo ni Rama ug sa BOPK kini tungod kay  sa politika ang personal nga interest maoy kanunay mopatigbabaw.