Tithes usa ka love offering

May mga relihiyon nga istriktong giimplementar ang pagpangayog 10% tithes back to the church gikan sa total income sa ilang mga sakop: ma-suweldo, halin sa kabtangan o kita sa negosyo.

Kon mopalta paghatag ang miyembro, matod pa sa kasaligang tinubdan, bisitahan kuno ug paninglon. Kay compulsory gyod kini.

Sa Romano Katoliko, dili pugson ang mga parokyano paghatag og 10% tithes. Kon pila ray ihulog sa collection bag panahon sa offertory, wala gyoy pari nga mobisita sa ilang balay niadtong mihulog og gamay.

Pero panahon sa gospel, inig wali, pasabton gyod sa pari ang manimba, nga kutob sa unsay blessings nga madawat sa atong pagpakabuhi ning kalibotan, kining tanan gikan sa Ginoo.

Busa, agig pasalamat, maayo gayod nga mohatag tag tithes balik ngadto Niya, nga mao ang Iyang simbahan.

Dili lang kanang dakong simbahan nga atong ampoan ang gipasabot. Kon dili, labaw na ang mga gagmay, nga mao ang mga kabos, kinsa tungod sa kapait, nagpaabot na lang may momhong mahulog gikan sa talad nga gikan-an sa mga adunahan.

Ang tithes usa ka love offering. Ug kay love man, dapat kinasingkasing ug wala tay kawili nga motunol niini ngadto sa Kahitas-an.

Sama niadtong gibuhat ni Abraham. Dihang gipangayo sa Ginoo ang bugtong anak ni Abraham agig halad pinaagi sa pagsunog ug pagbuno, sa walay pagpanuko, iya ning gituman. (Hinuon, gipugngan siya sa anghel, kinsa gisugo sa Ginoo aron dili madayon.)

Kadtong pobreng biyuda, kinsa wala maanugoning mihulog sa kataposan niyang duha ka sensilyo ngadto sa offering box para sa Ginoo, nakapadayeg ni Hesus, kinsa mitawag sa Iyang mga disipulo ug miingon:

“Sultian tamo. Kining kabos nga biyuda nakahatag og labaw sa tanan. Kay ang tanan naghatag gikan sa ilang kaadunahan. Apan naghatag siya sa iyang kakabos. Gihalad niya ang tanan nga iyaha, ang iyang kabuhian.”

Kini nagpasabot lang, nga kon kaantigo tang mo-share og 10% tithes nga walay kawili sa tanang blessings nga atong nadawat balik ngadto sa simbahan o mga nanginahanglan, sama ra nga didto ni nato gihatag sa Ginoo. Ug mosamot ang Iyang kalipay kon sundon nato ang gibuhat sa biyuda.

Kaanindot kaha, no, kon ang tanang kinaiya matakdan sa biyuda?