Katungdanan ug katungod

Oktubre 6, 2019: Ikakawhaag-Pito
nga Domingo sulod sa tuig

Mga Pagbasa:  Heb. 1;2-3;2-4/

Sal. 95/2 Tim. 1;6-14/Lk. 17;5-10

Kun maghisgot kita og katungdanan natural, linugdangan kini sa matang sa kinabuhi nga atong gipili. Kun pari ko katungdanan nako nga akong tubagon ang panginahanglang espirituhanon sa akong mga parokyano. Ang katungod nagpasabot nga sibo sa imong kahimtang imong pagadawaton ang usa ka prebilihiyo o kaayohan nga pinasikad sa hustisya. Sama pananglit sa anak, iyang katungod nga siya patunghaon sa iyang mga ginikanan labina sa mga higayon o katuigan nga iya kining gikinahanglan. Ang atong pagbayad og buhisan sa panudlanan sa nasud ato mang katungdanan apan katungod nato ang pagdawat og mga nagkadaiyang serbisyo gikan sa pangagamhanan.

Kun ang ebanghelyo nagkanayon nga isip mga sulugoon igo lamang kitang naghimo sa atong katungdanan, nagpasabot kini nga isip mga tinun-an ang maong pagtuman sa katungdanan ato mang gipasukad diha sa atong pagtuo sa Ginoo. Ang pagtuo dili lamang pag yango sa kamatuoran nga lisud sabton kondili ang pagtuo nagpasabot man og kalambigitan tali kanato ug sa atong gituohan. Nga sa ato pa, nituman kita tungod kay mituo kita ug sa atong pagtuo nahimong ang tanan gibuhat nato diha sa paghigugma.

Sa akong pagpamalandong ning maong bahina sa kasulatan nakita ko nga sa dihang miingon ang mga tinun-an nga dugangan ang ilang pagtuo ang mga tinun-an buot mopasabot nga unta mas makaila pa unta sila sa ilang magtutudlo sa mas suod nga paagi. Ang pagtuo nga pinasikad sa pag-ila ug kasinatian diha sa Dios ato mang kahimanan sa pagtidlom sa tubig sa kasegurohan. Seguro kita tungod kay nituo kita. Seguro kita tungod kay nahigugma kita sa atong gituohan.

Mao nga atong himamaton ang Dios diha sa Balaang Kasulatan ang sugilanon sa iyang dakong gugma kanato. Ato siyang sination diha sa mga sakramento ang kahimanan diin gihikap sa Dios ang mga mahinungdanong yugto sa atong kinabuhi ug nga atong gituki ang rason sa iyang dakong gugma pinaagi sa mga pagtulon-an sa Simbahan. Faith should be informed by reason and reason should be informed by faith. Ug labaw sa tanan, atong puy-an ang pagtuo diha sa buhat sanglit ang pagtuo nga walay buhat, patay.