Mas lapad nga suliran

Gipaabot nga mas molapad pa ang problema sa Metro Cebu Water District sa supply sa tubig sa mosunod nga mga adlaw.

Kini tungod kay gawas sa paghubas sa ilang mga tinubdan tungod sa kainit, posibling did-an usab sila sa Liloan nga makapadayon sa operasyon sa 17 nila ka mga bomba sa tubig didto sa naasoy’ng lungsod.

Ang konseho sa Liloan mipasar og resolution nagtugot ni Mayor Christina Garcia Frasco nga putlon ang dul-an na sa 30 ka tuig nga kasabutan sa lungsod uban sa MCWD nga nagtugot sa water district pag-operate og mga bomba sa tubig.

Ang hinungdan tungod kay wala makatuman ang MCWD nga siguroong dunay igo nga supply sa tubig ang mga molupyo sa maong lungsod. Matud sa mga opisyal sa Liloan, dili makiangayon alang nila nga gisuyop sa MCWD ang ilang mga tinubdan apan wala silay supply sa tubig.

Kun tumanon ni Frasco ang resolution sa iyang konseho, moabot sa 15 milyones ka litro sa supply sa tubig matag-adlaw ang mahanaw sa MCWD. Nagpasabot ni nga mosamot pa ang problema sa kuwangan sa supply.

Daan na nga nag-atubang og seryosong suliran sa tinubdan ang MCWD. Gani gipahibawo sa kadagkuan sa water district niadtong miaging adlaw ang padayong pagkunhod sa ilang inadlaw nga production.

Matud sa MCWD nga nakasinati sila og 32 mil cubic meters nga kakuwangan sa ilang inadlaw nga production. Sa kasamtangan anaa nalang sa 215,000 cubic meters ang ilang kinatibuk-ang production matag-adlaw.

Ang labing apektadong tinubdan mao ang Jaclupan diha sa Talisay nga nawad-an og dili mominus sa 10,000 cubic meters. Tungod niini, matud sa MCWD maapektuhan ang mga konsumidor sa Bulacao, Basak Pardo, Mambaling, Basak San Nicolas, Inayawan, Banawa, Capitol Site, ug Calamba.

Sugod niadtong Sabado nagrasyon nasab sila og tubig sa mga konsumidor diha sa Barangay Sambag 1 ug 2, Sta. Cruz, ug Cogon Ramos.

Panahon na nga usbon sa MCWD ang ilang prioridad ug himoong dinalian ang pagpangita og alternatibong tinubdan sa tubig. Labing maayo og gamiton sa mga opisyal niini ang dakong bahin sa ilang kita pagpalambo sa ilang serbisyo inay nga himoong gatasan aron pagtagbaw sa ilang personal nga mga kapritso.