Elderly Filipino Month

Oktubre: magsaulog na usab kita sa Senior Citizens Month. Gihan-ay na sa Office of Senior Citizens Affairs (OSCA) ang mga kalihokan nga molungtad gayud og usa ka buwan. Hinuon, dili kada adlaw ang mga kalihokan, kundili matag Sabado lang, Ug nalakip sa schedule ang Oktubre 19 nga pagpanghatag sa financial assistance ngadto sa mga senior citizens.

Ang gilaraw nga mahimong tema sa kasaulogan mao,”Senior Citizens: Kaabag sa Pagpalambo sa Dakbayan sa Sugbo.”  Nagpasabot nga gumikan sa taas nga kasinatian sa pagpang-alagad, ug gumikan sa giingon nga wisdom ug maturity sa mga senior citizens, daghan pa kita’g ikatampo pagpalambo sa dakbayan.

Ang Rule V, Art. 13, Sec. 1 sa RA Act 9994 kon ang Expanded Senior Citizens Act of 2010 nagkanayon: “ Senior citizens who have the capacity and desire to work, or to be re-employed shall be provided by the DOLE, in coordination with other government agencies including local government units, with information and matching services to enable them to be productive member of society.”

So, kaya pa. mahimo pa kitang mga productive members sa katilingban, dili kay ipadaplin na lang. So, tukma ang nahunahunaan nga tema nga mahimo pa kitang kapahimuslan pagpa-uswag sa atong dakbayan.

Ang mga kalihokan naglakip sa Santos nga Misa sa unang adlaw sa Oktubre, sundan kini og mubong tulomanon ug mga pasundayag sa pagsayaw ug pag-awit sa nagkalainlaing chapter associations sa mga barangay.

Aduna unyay medical-dental mission, wellness program, ug walk for health. Ang mga kalihokan anha ra himoa sa Plaza Sugbu.

Kining atong pagsaulog sa Senior Citizens Month, subay sa Procalamation No. 470 nga giluwatan niadtong September 26, 1994. ug pahiuyon sa pagsaulog usab sa United Nations International Day for Older Persons, usa ka tribute ngadto sa mga individuals, groups and older people around the world, kinsa mi-dedicate sa ilang kinabuhi pagpanalipod sa mga katungod sa katigulangan.

Ang Procalamation No. 470 “ aims to increase public awareness on the different issues concerning the older persons’ sector.”  Nationally, usa ra ka semana ang ilang pagsaulog didto. Lahi dinhi sa ato, nga usa gyud ka buwan.

Didto sa kaulohan kabahin sa ilang usa ka semana nga kasaulogan, libre sa mga senior citizen ang pagsakay LRT ug sa MRT. Free LRT, MRT rides. Wa man tay LRT ug MRT dinhi sa ato, di ba kaha mahimo nga libre ang atong pagsakay sa mga modernong jeepney. Di kinahanglan nga matag adlaw sulod sa bulan sa Oktubre, bisag kada Sabado ug Domingo lang.

By the way, adunay mga lataw ug  tinguha nga ang Universal Social Pension usbawan ngadto sa P1,500.  Ang P500 di gyud paigo pagtubag sa mga kinahanglanon sa mga indigent senior citizens. Ambut kon nahimo na ba kining balaud. Nagpasabot lamang kini nga ang ato diayng magbabalaud naghunahuna usab sa kahimtang natong mga senoor citizens, labi na ang mga indigent senior citizens. Dili kay pork barrel lang ang nasulod sa ilang utok.

Aniay nga tema atong nakutlo gikan sa AARP: “Enriching the Experience of Aging; To equip each senior citizen to live their best lives; Turning goals and dreams of Senior Citizens into real possibilities.”