Gusto ni Cebu City Mayor Edgardo Labella nga makatanom og tulo ka milyon ka kahoy ang iyang administrasyon sulod sa tulo ka tuig aron makatabang kini sa pagpanalipod sa kalikopan ug maminusminusan ang pagsige og baha sa dakbayan.
Apan samtang gusto nga mananom og minilyon nga kahoy ang mayor sa dakbayan sa Sugbo, ang Department of Public Works and Highways (DPWH) nagsige pod og pamutol sa mga kahoy sa dakbayan sa Sugbo.
Human nila gipangputol ang mga dagko nang kahoy sa may S. Osmeña Boulevard sa North Reclamation Area, giputol napod nila ang lima ka mga dagkong punoan sa kahoy sa may dalan M. Velez duol sa Kapitolyo uban sa ilang pagpakigkonsabo sa Department of Environment and Natural Resources (DENR) nga mihatag og pagtugot sa pagputol sa hapit na mag-centenarian nga mga kahoy sa kondisyon nga ang DPWH mohatag og hapit pod moabot sa usa ka milyon ka mga seedlings ngadto sa DENR alang sa greening program sa nasud.
Wala ko ani makasabot. Kun gusto man nga kab-uton sa DENR ang ilang tinguha nga mahimong green tan-awon ang palibot sa nasud nganong ila man nga gitugotan ang pagpamutol sa dagko na nga mga kahoy nga nakatampo na sa pagka green sa atong palibot? Nganong mananom pa man kun putlon man lang inig ka dagko na niini?
Sa laing bahin, suportado nako ang laraw ni Labella nga mananom og tulo ka milyon ka mga kahoy sulod sa tulo ka tuig niyang termino apan ako usab nga isugyot ngadto kaniya nga ang programang pasiugdahan dili lamang kini kutob sa pagpananom og kahoy i-apil usab unta sa programa ang pag-atiman gayod sa kahoy nga gitanom aron kini mabuhi.
Wala man god pulos kun igo ra ta sa pagpananom unya pagkahuman dili na balikon. Mao ni ang hinungdan nganong wala nato makita karon ang atong gipangtanom kaniadto nga mga kahoy.