Unsay alas ni Faeldon?

Unsay alas ni kanhi Bureau of Correction (BuCor) director Nicanor Faeldon nganong bisan sa dagko niyang bulilyaso bilib gihapon si Presidente Rodrigo Duterte niya?

Nganong inay balikason puno man sa mga pagdayeg ang atong madungog gikan sa presidente?

Ug nganong daw lisud alang ni Duterte nga isalikway si Faeldon?

Pipila lang ni sa daghan pang kutay sa mga pangutana nga nakahatag og kalibog sa huna-huna sa publiko sa pagtratar ni Duterte sa mga kontrobersiya nga gilambigitan ni Faeldon.

Duha ka adlaw human niya tangtanga si Faeldon gikan sa BuCor tungod sa pagpagawas sa dul-an 2,000 ka mga konbiktado og heinous crimes ubos sa Good Conduct Time Allowance kun GCTA, gidayeg ni Duterte si Faeldon sa iyang kaligdong.

Atol sa groundbreaking sa housing project alang sa mga biktima sa landslide didto sa dakbayan sa Naga niadtong Biyernes, gipadayag ni Duterte ang iyang pagdayeg kang Faeldon.

Matud niya nga tarong ug ligdong siya nga opisyal. Kun alang sa presidente ligdong si Faeldon, nganong iya mang gitangtang sa pwesto?

Dili ba nga ang rason nga iya kining gipaluwat sa katungdanan tungod kay wala mopatuo sa kamandoan nga dili ilakip sa mga beneficiaries sa GCTA ang mga konbiktado og heinous crimes?

Unsaon pag-reconcile sa presidente sa iyang pamahayag? Atol sa hearing sa Senado nabisto nga dunay binayranay nga nahitabo bugti sa pagbuhi sa mga priso kini human ang kapuyo sa usa sa mga binilanggo miangkong gipangayoan siya og P50 mil.

Samtang didto pa si Faeldon sa Bureau of Customs binilyon ang kantidad sa shabu nga milusot gikan sa China.

Mao ba ni sukdanan ni Duterte sa kaligdong ni Faeldon? Mao nga makalibog og unsay alas nga gihuptan ni Faeldon batok sa presidente nga daw sa santos man siya alang niini.

Hangtud kanus-a makaamgo si Duterte nga dili asset sa iyang administrasyon si Faeldon kun dili dakong liability.

Sa paglusot sa binilyon nga drug shipment panahon ni Faeldon sa Bureau of Customs ug ang pagbuhi niini sa upat ka mga Chinese drug lords dihang siya maoy haring gangis sa BuCor igo na untang sukaranan aron siya isipon ni Duterte nga liability tungod kay ang maong mga hitabo maisip nga pagsabotahi sa kampanya sa gobyerno batok sa illegal nga drugas.

Sa dili pa hingpit motuo ang publiko sa mga pasangil gikan sa iyang mga kaatbang sa politika, angayang modistansiya si Duterte gikan ni Faeldon ug likayang itudlo pa kini og laing pwesto ubos sa iyang administrasyon.