Maayo tingali nga klarohon gyud sa Land Transportation Office (LTO) ang paghatag nila og “Authority” sa paggamit og “Improvised Temporary License Plate Numbers” aron walay mga motorista nga makamulta tungod ra usab sa ilang mga sipyat.
Gilakbitan na nako kini sa akong lindog sa miaging semana, apan balikon nako kay hangtod karon nagpadayon man nga wala usba ang sistema nila.
May driver man gud nga nangayo’g tabang kanako kay nadakpan lagi kuno siya tungod kay ang gimaneho niya nga taxi, nigamit og temporary license plate numbers nga unom ra ka numero, sama niini “070906.” Mao ni ang gamiton sa LTO pag-ila kanus-a narehistro ang sakyanan.
Ang 07 nagrepresentar sa Region-7, unya ang 09 nagpasabot nga Septiyembre, ug ang 06 ang petsa kagahapon.
Ambot ngano kaha nga ang LTO nasipyat man og mihimo’g “authority” nga ang ipahimo nga temporary license plate mao ang 070906.
Kun kini maoy himoon, pwerteng daghana nga mga sakyanan nga managsama ang plate numbers. Karon, ang LTO ra usab maoy manakop kay kuno sayop ang gibutang nga plaka sa sakyanan.
Pastilan, kamo ra ang naghatag og “authority” nga kini maoy gamiton, unya kamo ra sab ang manakop?
Nganong nasayop man kamo nga ang LTO Central Office niisyu man og Memorandum kaniadto pa nga Enero 11, 2017 aron magiyahan ang ilang mga kawani sa district offices.
Ang Memorandum nga gipirmahan ni LTO Chief Edgar Galvante nagmando nga kun bag-o gani nga four-wheeled nga sakyanan, ang gihatag nga Conduction sticker number sa maong sakyanan maoy gamiton nga temporary plate number.
Kun motorsiklo, mga used ug rebuilt nga sakyanan, ang Motor Vehicle File Numbers, sama sa 0701-354647 maoy gamiton.
* * *
Karon, usa sa mga sakyanan sa LONA Taxi nigamit og improvised plate nga 073204. Ang driver nga si Sergio Delmar Escultor gidakop tawon sa LTO Agent nga si Jessica Algarme.
Karon, mangutana ko, si Escultor diay ang sad-an ug maoy pabayron sa multa nga dili man siya maoy tag-iya sa sakyanan?
Ang sad-an niini mao ang tag-iya sa LONA Taxi nga wala ra ba gyud motabang aron malukat ang lisensya sa iyang driver.
Naunsa gud tawon ka ma’am, maayo ka lang mokumkom sa abang sa imong taxi unya ang imong driver nga nadakpan tungod sa imong sayop dili nimo tabangan?
Kun ang driver nga si Escultor nadakpan pa kay giilisan niya ang plaka sa sakyanan, siya maoy sad-an, apan kamo nga tag-iya sa taxi maoy sayop, apil sab ang taga LTO.
Kini sab si Agent Jessica, wala ba nimo tan-awa nga ang authority paggamit og improvised plate, nagtugot nga ang gi-attach nga numero maoy gamiton? Kinsa may sad-an?