EDITORYAL - Nakamata na gyud

Nakamata ra gyud kadugayan si Pres. Duterte sa mga kapalpakan ni Bureau of Corrections (BuCor) chief Nicanor Faeldon tungod niining kontrobersiya sa pagpagawas sa mga bilanggo nga nalambigit sa mga linoog nga krimen gamit ang good conduct time allowance law.

Si Faeldon daan nang miani og mga pagsaway sa dihang siya pay hepe sa Bureau of Customs sa dihang nakalusot ang P6 Bilyones nga kantidad sa gituohang shabu dinhi sa nasud.

Apan inay nga imbestigahon ug papanubagon sa kapalpakan gibalhin ra siya og pwesto. Una gibutang siya ni Duterte sa Office of Civil Defense ug paglabay sa pipila ka bulan siya maoy nihulip sa gibiyaang pwesto ni kanhi PNP Director General Ronald “Bato” dela Rosa isip hepe sa BuCor sa dihang ang naulahi nikandidato pagka-senador.

Sa panahon ni Faeldon sa BuCor giingong gipabuhian niya ang dul-an dos mil ka mga bilanggo nga pulos nalambigit sa linoog nga krimen. Gani, si Senador Panfilo Lacson miingon nga ang uban sa mga gipabuhian ni Faeldon mga Chinese drug lords.

Apil sa mga nakagawas mao ang Chiong sisters kidnap-slay convicts hinungdan sa kasagmuyo sa publiko. Diriyot pa gani maapil sa makagawas unta ang laing rape-slay convict nga si kanhi Calauan mayor Antonio Sanchez.

Kung wala pa mogawas sa media ang balita, dako ang posibilidad nga nakagawas na unta si Sanchez.

Giunsa man pagkahitabo nga naa man sa maong balaod nga walay labot sa GCTA ang mga kriminal sa bangis nga krimen?

Dili kalikayan ang pagdudang may nakadawat og suborno sa mga opisyales sa BuCor aron makagawas kining mga dili unta angayang pagawson.

Tungod niini, posibleng iapil sa imbestigasyon ang tanan nahimong hepe sa BuCor sukad milingkod si Duterte nga pulos niya tanan tinudlo.

Kinahanglang limitahan kutob ra rekomendasyon ang BuCor chief apan dili siya maoy mopirma sa release order kondili ang mas taas pa kaniya sama sa DOJ, Korte Suprema o ang presidente sa nasud.