EDITORYAL - Cebu City College

Sa tanang dagkong mga siyudad sa Metro Cebu, bugtong ang Cebu City lang ang walay matawag nga city college nga diin mahimong makatungha ang mga kabus nga mga konstituwente niini.

Apan kinahanglan pa ba gyud kini? Naay scholarship program ang dakbayan karon nga labaw pa sa mga silingang mga siyudad.

Libreng nakatungha sa kolehiyo kadtong mga tinun-ang nakitang angayang tabangan sa siyudad.

Naka-enroll sila sa mga nindot nga mga kolehiyo ug unibersidad karon sa dakbayan pinaagi sa maong scholarship program nga diin ang dakbayan maoy nagbayad og milyones ka pesos matag tuig.

Apan ang maong ayuda miagi sab og kontrobersiya nga dili ikalimod tungod gihapon sa politika.

Dakong pahat sa mga city scholars adto man na-enroll sa tunghaan nga konektado sa usa ka politiko sa dakbayan ug may mga pasangil nga dunay ‘conflict of interest.’

Ang mga siyudad sa Talisay, Lapu-Lapu ug Mandaue adunay kaugalingong mga city colleges, gani sa Mandaue duha ka buok.

Nagtinguha karon si Konsehal Raymund Garcia nga magtukod sab og susamang institusyon ang Cebu City.

Niadtong nakalabay nga tuig duna nay ordinansa para niini ug kinahanglan nalang nga tun-an pagbalik aron mapalambo ug mausa ug masugdan ang plano.

Base sa nigawas nga report, ang mga kursong Information Technology ug Hotel and Restaurant Management ang inisyal nga mga kursong i-offer.

Apan mas maayo gani nga anha nalang sab ibutang ang short courses sa Department of Manpower Development Program sa siyudad nga pang-livelihood program sa mga kabus.

Kun ang Banat New s maoy pangutan-on, mas maayong magtukod ang dakbayan og kaugalingong city college dili aron diha tanan patunghaon ang mga city scholars kondili aron makamenus sa gastos ug kahasol.

Kadtong mga kursong ma-offer sa city college nga maoy gustong kuhaon sa city scholar di na kinahanglang adto pa magpa-enroll sa mga pribadong kolehiyo ug unibersidad nga ang dakbayan ra gihapoy magbayad.