Pagpalambo sa tanang pinulongan
Inay ipatigbabaw ang usa ka nasudnong pinulongan (nga hangtod karon gilalisan pa kon ipasikad ba sa Tagalog, nga gipamugos ni Presidente Manuel Quezon, o sa Sugbuanon, nga giisip nga maoy gilitok sa labing daghan atol sa pagpahigayon sa 1934 Constitutional Convention) giawhag ang kadagkoan sa kagamhanan sa pagpalambo sa tanang pinulongan sa mga lalawigan sa Pilipinas.
Ang awhag giluwatan sa Multilingual Philippines, kahugpongan sa mga eksperto nga nangampanya alang sa mas makiangayon nga mga lagda sa pinulongan ug edukasyon. Gilista nila ang nag-una nga kaayuhan sa katawhan nga makat-on sa mas daghan nga pinulongan:
* * *
• Mas daghan ang ilang kahigayonan sa trabaho kay mas daghan nga kliyente ang ilang ikasinabot kay sa mga aplikante nga usa o duha ra ka pinulongan ang nahibaw-an;
• Kay mas daghan man og kapilian maangkon ang labing tukma nga trabaho kay segun sa kalibotanong pagtuon mas modako ang kita og gikan sa 4-20% sa matag dugang mahibaw-an nga pinulongan;
• Makahangyo og mas makiangayon nga presyo kay kon kamao sa pinulongan sa tigbaligya mas daling masuod ug mas makadasig og mas mahigalaon nga mga transaksiyon;
* * *
• Mas sayon ug mas daghan ang tinubdan sa kasayuran—langyaw nga programa sa radyo, o dinaliang pahibawo sa katalagman, o libak sa kapihan—mas makasabot sa mga kultura;
• Mas dako ang katakos sa pagkat-on og dugang pinulongan kay mas pamilyar man sa mas daghang tingog, lagda ug istruktura sa langyaw nga mga pinulongan; ug
• Napamatud-an sa mga siyentipiko nga ang pagkat-on sa mas daghang pinulongan makapalambo sa katakos sa pagsulbad sa mga suliran, pagsag-ulo, pagkamamugnaon sa panghunahuna ug paglikay sa mga sakit sa utok sama sa kalimtanon.
* * *
Nisugyot sila sa pag-usab sa kasaulogan matag Agosto gikan sa “Buwan ng Wikang Pambansa” ngadto sa “Buwan ng mga Wika.” Mahimong mahunong dayon ang puhalay sa Tagalog, Sugbuanon ug ubang pinulongan kon mahatagan na og managsamang kahigayonan sa paglambo.
May sukaranan ang paglaom nga ang Bisaya nga presidente makatabang sa pagpanalipod sa ubang mga pinulongan nga inanay nang gilamoy sa Tagalog nga maoy nidominar sa nasudnong telebisyon, komiks ug pelikula. Apan bisan ang holiday ni Lapu-Lapu nga gipasalig nga himuon nga nasudnong bayani hangtod karon naa ra gihapon sauloga sa Opon.
- Latest
