Kung di mo’g ROTC, ayaw!

Daghan ang mga bagulbol bahin sa paghimong mandatory sa Reserve Officers Training Corps (ROTC) sa kolehiyo. Kini tungod kay daghan kanila ang wala gyud masayod kun unsa kini.

Ang ROTC kaniadto kuhaon sa first year college hangtud sa second year college. Mao kini ang Military Science (ang uban Naval Science) MS-11, MS-12, MS-21 ug MS-22. Duha ka tuig kini. 

Kadtong gustong mopadayon ug nagtinguhang mosulod sa Armed Forces of the Philippines isip opisyal, mahimong mopadayon ini’g kahuman sa MS-22 ug mopa-enroll og MS-33 hangtud na MS-43 (advance ROTC).

Ang ROTC maoy ikaduha nga tinubdan sa mga opisyal karon nga nagserbisyo sa AFP.

Alang sa kasayoran sa tanan, dili tanang opisyal karon sa AFP gradwado o gikan sa prestihiyosong Philippine Military Academy.

Ang kadaghanan sa mga opisyal sa AFP produkto sa ROTC pinaagi sa pagkuha og Officer Preparatory Course (OPC) ug ang Officer Candidate Course (OCC).

Sa OPC, sagad niini mga opisyal sa ROTC nga na-commission isip 2nd Lieutenant isip reservist ug nagpa-commission o gitawag og call to active duty (CAD).

Sagad kanila nga propesyonal na nga wala pay 31 anyos nga gustong mosud sa AFP.

Samtang ang OCC, mao kadtong mga gradwado sa kolehiyo nga nag-edad og 21 hangtud 29 anyos.

Kaning mga negatibong komento diha sa mga social media batok sa ROTC ang kadaghanan gikan sa mga tawong walay alamag kun unsa kini ug unsa kini kamahinungdanon sa nasud.

Labaw sa tanan, kadaghanan kanila wala gani masayod nga wala gyud wagtanga ang ROTC sa kolehiyo kondili gidugangan lang og kapilian ang mga estudyante pinaagi sa National The National Service Training Program (NSTP) subay sa Republic Act 9163 o NSTP Act of 2001,.

Duna kini tulo ka programa, ang Civic Welfare Training Service (CWTS); Literacy Training Service (LTS) ug ang Reserve Officers’ Training Corps (ROTC).

Ang tumong aning tulo mao ang pag-andam sa kabataan sa ilang papel sa katilingban ug depensa sa nasud. Pagpalambo sa ilang kinaiya ug pagmahal sa nasud.

Pili lang asa gusto. Kun di gusto og ROTC adto sa CWTS o sa LTS kay hadlok mabuwad sa init (nga mao gyuy tinuod nga rason).

Dili nalang unta magkutib-kutib ang mga baba nga wala masayod sa ilang gipanulti.