Maayo pakugon ang ulo
Mohimo na karon ug special audit ang COA ngadto sa PhilHealth gumikan sa awhag sa mga senador pinangulohan ni Senador Franklin Drilon kinsa nagtuo nga ang kahimtang ug anomaliya sa PhilHealth nagkagrabe na.
Pastilan ang COA, kinahanglan pa’ng awhagon aron mobuhat sa ilang mandato.
Pastilan usab ang PhilHealth, taliwala sa tunglo sa mga tawo, padayon gihapon ang tinonto. Kaayo na man gyud pakugon ang mga ulo!
Dili mosunod ni ninoy
Atol sa adlaw sa paghinumdum sa kamatayon ni Ninoy Aquino niadtong Agosto 21, 2019, miawhag si Presidente Duterte sa katawhang Pilipinhon sa pagpamalandong ug paghimong panig-ingnan sa kinabuhi ug mga sakripisyo nga gihimo sa namatay nga senador ug giila nga bayani sa nasud. Apan miingon ang akong higala nga dili lang siya mosunod ni Ninoy kay basin mapriso pud siya dayon patyon inig kahuman. Bitaw no?
Lahi na ang kahulogan sa kapa
Upat ka miyembro sa kontrobersyal nga pundok nga Kapa Community Ministry International, Inc. gitumbok nga maoy suspetsado sa pagpatay kang Eduardo Dizon, Brigada News anchor didto sa Kidapawan City, Cotabato. Tungod niining kalamboan, aduna na’y lahi nga kahulogan ang pulong Kapa: sa mga miyembro, ang Kapa nagkahulogan og Kabus Padatoon; sa mga kritiko, ang Kapa nagkahulogan og Kaaway Pahilomon/Patyon! Bantay-bantay!
Di na pwede ang baho?
Matud pa sa balita, ang maanindot nga baho o ang kahumot sa usa ka buhatan adunay positibo nga impluwensya diha sa mga empleyado kay kini makapadugang sa focus ug enerhiya ingon man makapawagtang sa stress. Kon himuon na kini nga polisiya sa mga pribadong kompaniya, mahimong dili na dawaton sa trabaho ang mga baho’g lawas og ilok. Dili ba unya kini lain’g matang na usab sa diskriminasyon? Nangutana lang!
Bagong milleniors
Adunay programa nga gipasiugdahan ang usa ka telephone company kansang tumong mao ang pagtudlo sa mga Milleniors, ang mga hamtong ug edaran nga miyembro sa katilingban, unsaon paggamit ang mga smartphones ug mga social media platforms sama sa Facebook, mga chat apps sama sa Messenger ug uban pa. Baya kon makat-on na unya ang mga Milleniors, wala ba kaha’y linung-ag nga mangapa-ig o di ba kaha labhonon nga magtipun-og kay magpunay na man lang og Facebook. Faeetz!
- Latest
