Gipa sub-lease ang iyang giabangan nga pwesto

Dear Atty. Divine,

Duna koy pwesto sa merkado nga giabangan og P7,000.00 ang matag buwan. Ang among sabot sa tag-iya nga kun akong i-renovate ang property kinahanglan ako ang mogasto ug dili na i-deduct sa akong abangan so misugot ko og akong gipa renovate. Karon dunay laing manindahay nga mihangyo nako nga mobutang siya og lamesa sa akong pwesto ug misugot ko apan ako sab nga gipaabang og P3,000 matag buwan. Karon pagkahibawo sa tag-iya nga nagpaabang ko og lain kay nasuko man ug iya man kong papahawaon. Mosugot ko nga mohawa apan kinahanglan nga i-refund ko sa nagasto sa pag-renovate but dili man sab siya mobayad. Ang akong pangutana kun pwede ba diay kong papahawaon tungod sa akong gibuhat? Pwede ba nga akong tangtangon ang akong gidapat sa akong giabangan nga pwesto?  Pwede ba sab nga akoy mangita og moabang aron siya maoy mo-refund nako sa expenses sa renovation? Daghang salamat.

Pedro

* * *

Dear Pedro,

Ang dapat ninyong sundon mao unta gyud ang terms and conditions sa inyong Contract of Lease. Kun pananglit wa moy pinirmahan nga kontrata, generally, kun mangabang ka, dili gyud ka pwede nga magpa sub-lease gawas lang kun gitugot kini sa kontrata or kun nananghid ka unya misugot ang tag-iya. So kun nagpa sub-lease ka nga way pagtugot sa owner then pwede gyud ning kabasihan sa pagpapahawa nimo. Samtang kun gusto nimong tangtangon ang imong gidapat nga materyales sa pwesto nga imong gi-renovate mahimo man as long as dili ma damage ang property. Samtang  kanang  plano nimo nga maoy mangita og moabang aron maoy mo-refund nimo sa gasto sa renovation  di sad na mahimo kay di man ikaw ang tag-iya sa property except lang kun mosugot ang owner kalabot  sa imong plano. Mas maayo nga imong suwayan lang og hangyo ang tag-iya nga tugutan ka nga mopadayon sa pagabang pamasin nga mosugot kini. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News  or email aa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.