Panglimpyo ra ang tumong

Mipasidaan si Mayor Edgar Labella sa mga kapitan nga mahimo silang masuspenso kun dili nila mapadayon ang pagpanglimpyo sa ilang tagsa-tagsa ka barangay tungod kay matud pa sa Mayor, gimbuhaton man kini sa mga opisyales sa barangay. Pagpanglimpyo lang ang tumong sa Mayor ug dili ang paghatag og ideya sa mga kaatbang sa Kapitan nga maghugaw-hugaw sa ilang barangay aron lamang masuspenso ang naulahi.

tawgon na’g ‘seafoods’

Mihatag og kamandoan si Gov. Arthur Yap sa Bohol sa pagdili una pag-angkat og mga karne’ng baboy gikan sa kaulohan tungod sa taho nga daw adunay sakit nga mikuyanap karon sa mga baboyan didto.  Sa mga mahiligon gayod sa karne, mahimo nilang buhaton ang sugyot sa akong higala nga i-tambog na lang ang mga baboy ngadto sa dagat dayon dakpon kini pagbalik ginamit ang baling kon pokot. Sa ingon mahimo’ng pagatawgon na ang mga baboy og “SEAFOODS”. Pagkatoytoy!

Tinukmod sa kahangol

Human madeklarar nga ilegal, nagkasiak-siak na usab karon ang kahugpungan sa Kapa Community Ministry International, Inc. gumikan sa pagbuwag sa ubang miyembro aron magbuhat og ilang kaugalingon nga pundok.  Pastilan kining Kapa, ang mga namuhunan wala mabayri, ang ilang mga miyembro wala usab tingali bahini, mao nga maglain na lang. Pulos tinukmod sa kahangol ang gibuhat sa mga namuhunan ug mga miyembro.

Wa diay sugo-a

Nag-atubang karon og kaso nga Unjust Vexation ang usa ka lalaki didto sa kaulohan human siya pasanginli nga iyang gibagnod ang iyang kinatawo ngadto sa dalagita nga nakauban niya pagsakay sa MRT.  Wala tuohi sa dalagitang biktima ang pamahayag sa lalaki nga wala siya manghikap ug nga nagbuot-buot ra og tuyhakaw ang iyang kinatawo bisan wa niya sugo-a. Siawa lage!

Spaghetti pataas, spaghetti pababa

Gipanghingusgan karon ni Konsehal Jerry Guardo ang pagpasar og ordinansa nga magmando sa mga Utility Companies sa pagbalhin sa ilang mga kable gikan sa taas ngadto na sa ubos kon sa ilawom sa yuta. Ang maong lakang gitumong aron mahimon g luwas ang katawhan sa peligro gumikan niining gitawag og mga “spaghetti wires”.  Kun mapatuman kini, hayan maka-awit sa kalipay ang katawhan ginamit ang titik nga “Spaghetti Pataas, Spaghetti Pababa”!